மானாமதி ஊராட்சியில் சமூக நலக்கூடம் இல்லாததால், ஏழை மக்கள் தவித்து வருகின்றனர்.

திருப்போரூர் ஒன்றியம், மானாமதி ஊராட்சியில் மானாமதி, சந்தினாம்பட்டு, செங்கழுநீர் ஓடை, ஆனந்தபுரம், அகரம் உள்ளிட்ட துணை கிராமங்கள் உள்ளன.

இங்கு, 10,000க்கும் மேற்பட்டோர் வசித்து வருகின்றனர். இப்பகுதியில் தற்போது சமூக நலக்கூடம் இல்லாததால், இப்பகுதி மக்கள் தங்கள் வீட்டு சுப நிகழ்ச்சிகளை, அதிக கட்டணம் கொடுத்து தனியார் மண்டபங்களில் நடத்தி வருகின்றனர். மண்டபங்களில் நிகழ்ச்சி நடத்த முடியாத ஏழை மக்கள், கோவில்களில் நடத்த வேண்டிய சூழல் ஏற்படுகிறது.

எனவே, மக்கள் நலன் கருதி, மானாமதி ஊராட்சியில் சமூக நலக்கூடம் அமைக்க, அதிகாரிகள் நடவடிக்கை எடுக்க வேண்டும் என, அப்பகுதி மக்கள் கோரிக்கை விடுத்து உள்ளனர்.

இதுகுறித்து மானாமதி மக்கள் கூறியதாவது:

அதிக மக்கள் கொண்ட ஊராட்சியாக மானாமதி ஊராட்சி உள்ளது. 10க்கும் மேற்பட்ட மக்கள் வசித்து வருகின்றனர். கடந்த 1996--2000ம் ஆண்டுகளில் அண்ணா மறுமலர்ச்சி திட்டம் மூலமாக, சமூக நலக்கூடம் கட்டப்பட்டது.

பிறகு, 2012ம் ஆண்டு முதல், அரசு ஆரம்ப சுகாதார நிலையமாக செயல்படுகிறது. இதனால் தற்போது, மானாமதி ஊராட்சி மக்கள் சுப நிகழ்ச்சிகளை குறைந்த கட்டணத்தில் நடத்த மிகவும் சிரமப்படுகின்றனர்.

தனியார் மண்டபத்தில் 60,000 ரூபாய் முதல், ஒரு லட்சம் ரூபாய் வரை வசூல் செய்யப்படுகிறது. எனவே, மக்கள் நலன் கருதி, மானாமதி ஊராட்சியில் சமூக நலக்கூடம் அமைக்க வேண்டும்.

இவ்வாறு அவர்கள் கூறினர்.