திருப்போரூர் பேரூராட்சி, ஓ.எம்.ஆர்., சாலையில் பேருந்து நிலையம், ரவுண்டானா, மாமல்லபுரம் சாலை, இள்ளலுார் சாலை ஆகிய நான்கு இடங்களில், அரசு டாஸ்மாக் மதுபானக்கடை செயல்பட்டு வந்தது. தமிழகம் முழுதும் 500 மதுக்கடைகளை மூட, அரசு உத்தரவிட்டது.

இதில், திருப்போரூரில் மாமல்லபுரம் சாலையில் இருந்த ஒரு மதுக்கடை, பேருந்து நிலையம் அருகே இருந்த ஒரு மதுக்கடை, ரவுண்டானா அருகே இருந்த ஒரு மதுக்கடை என, மூன்று மதுக்கடைகள் மூடப்பட்டன.

தற்போது, திருப்போரூர் - இள்ளலுார் சாலையில் உள்ள ஒரு மதுக்கடை மட்டும் செயல்பட்டு வருகிறது.

இந்த மதுபானக்கடையை கடந்து தான் இள்ளலுார், செங்காடு, காயார், வெண்பேடு, காட்டூர், நெல்லிக்குப்பம் உள்ளிட்ட பல கிராமங்களுக்கு பொதுமக்கள், பள்ளி மாணவ - மாணவியர் செல்ல வேண்டிய நிலை உள்ளது.

பேருந்து வராத நேரங்களில் ஆட்டோ, சைக்கிள், பைக் போன்றவற்றிலும், சிலர் நடந்தும் கிராமங்களுக்குச் செல்கின்றனர்.

இவ்வாறு, செல்லும் வழியிலேயே மதுக்கடை உள்ளதால் பாதுகாப்பற்ற நிலை ஏற்படுகிறது.

மேலும், இள்ளலுாரில் சென்னை ஒண்டர்லா என்ற பொழுதுபோக்கு மையம், டிச., 1ம் தேதி, முதல்வர் ஸ்டாலினால் திறந்து வைக்கப்பட்ட பின், செயல்பாட்டிற்கு வருகிறது.

இதனால், வழக்கத்தை விட வாகன போக்கு வரத்தும், மக்கள் நடமாட்டமும் அதிகரிக்க வாய்ப்புள்ளது.

எனவே, மக்கள் பாதுகாப்பு கருதி, மேற்கண்ட இந்த ஒரு மதுக்கடையை ஒதுக்குப்புறமான பகுதிக்கு மாற்ற வேண்டும் என, சமூக ஆர்வலர்கள் கோரிக்கை விடுத்துள்ளனர்.