செங்கல்பட்டு அருகே ஜி.எஸ்.டி., சாலையில் ஏற்பட்ட விபத்து காரணமாக, 3 கி.மீ., துாரத்திற்கு வாகனங்கள் அணிவகுத்து, கடும் போக்குவரத்து நெரிசல் ஏற்பட்டது.

சென்னையில் இருந்து மதுராந்தகம் நோக்கி, நேற்று காலை 8:45 மணியளவில், 'எய்ச்சர்' சரக்கு வாகனம் ஒன்று சென்றது. செங்கல்பட்டு அடுத்த இருங்குன்றம் பள்ளி அருகே சென்ற போது, ஓட்டுநரின் கட்டுப்பாட்டை இழந்த சரக்கு வாகனம், சாலை மைய தடுப்பு சுவரில் மோதி விபத்து ஏற்பட்டது.

நல்வாய்ப்பாக, யாருக்கும் காயம் ஏற்படவில்லை. தகவலறிந்து சம்பவ இடத்திற்கு வந்த செங்கல்பட்டு தாலுகா போலீசார், விபத்துக்குள்ளான சரக்கு வாகனத்தை, 'கிரேன்' இயந்திரம் மூலமாக அப்புறப்படுத்தினர்.

இந்த விபத்து காரணமாக, சென்னை - திண்டுக்கல் தேசிய நெடுஞ்சாலையில் இருங்குன்றம் பள்ளி முதல் பழவேலி வரை, மூன்று கி.மீ., துாரத்திற்கு வாகனங்கள் அணிவகுத்து நின்றன. இதனால், ஒரு மணி நேரத்திற்கும் மேலாக கடும் போக்குவரத்து நெரிசல் ஏற்பட்டது.

வாகன ஓட்டிகள் கடும் அவதிப்பட்டனர். போக்குவரத்தை சீரமைக்கும் பணியில் போலீசார் ஈடுபட்டனர்.