சிங்கபெருமாள் கோவில் அருகே, புதிதாக திறக்கப்பட்ட ரயில்வே மேம்பாலத்தில் மின் விளக்குகள் எரியாததால், வாகன ஓட்டிகள் அவதிப்பட்டு வருகின்றனர்.

செங்கல்பட்டு புறநகரில் வளர்ந்து வரும் பகுதியாக, சிங்கபெருமாள் கோவில் உள்ளது.

இங்குள்ள சிங்கபெருமாள் கோவில் -- ஸ்ரீபெரும்புதுார் நெடுஞ்சாலையில், தினமும் ஆயிரக்கணக்கான வாகனங்கள் சென்று வருகின்றன. குறிப்பாக ஒரகடம், ஸ்ரீபெரும்புதுார் பகுதிகளுக்கு அதிக அளவில் வாகனங்கள் செல்கின்றன.

மேலும் ஆப்பூர், திருக்கச்சூர், கொளத்துார், தெள்ளிமேடு உள்ளிட்ட 20க்கும் மேற்பட்ட கிராம மக்கள் சிங்கபெருமாள் கோவில், தாம்பரம், செங்கல்பட்டு உள்ளிட்ட பல்வேறு பகுதிகளுக்குச் சென்று வர, இந்த சாலையைப் பயன்படுத்தி வருகின்றனர்.

இந்த பகுதியில் ரயில்வே 'கேட்' அடிக்கடி மூடப்பட்டதால், கடும் போக்குவரத்து நெரிசல் ஏற்பட்டு வந்தது. இதையடுத்து, இப்பகுதி மக்களின் கோரிக்கையை ஏற்று, 2008ம் ஆண்டு மேம்பாலம் அமைக்கும் பணிகள் துவக்கப்பட்டன.

138 கோடி ரூபாய் மதிப்பில் மேம்பாலம் கட்டப்பட்டு, கடந்த ஜூன் மாதம் பயன்பாட்டிற்கு திறக்கப்பட்டது.

வாகன ஓட்டிகளின் வசதிக்காக, மேம்பாலத்தின் மீது 100க்கும் மேற்பட்ட மின் விளக்குகள் அமைக்கப்பட்டன. இந்நிலையில், மேம்பாலத்தில் உள்ள ரவுண்டானாவின் ஒரு பகுதியில்‍, செங்கல்பட்டு மார்க்கத்தில் உள்ள மின் விளக்குகள், கடந்த ஒரு மாதமாக எரிவதில்லை.

இதன் காரணமாக, விபத்து ஏற்படும் அபாயம் ஏற்பட்டுள்ளது. எனவே, இந்த மின் விளக்குகளை சீரமைக்க, நெடுஞ்சாலை துறை அதிகாரிகள் உரிய நடவடிக்கை எடுக்க வேண்டும் என, வாகன ஓட்டிகள் கோரிக்கை விடுத்துள்ளனர்.