சென்னை சாலிகிராமத்தைச் சேர்ந்த பொறியியல் பட்டதாரி இளம்பெண் ஒருவர், சினிமா படங்களில் துணை நடிகையாக உள்ளார். இவருக்கும், கனடாவில் பணிபுரியும் மென்பொருள் நிறுவன ஊழியர் அலெக்ஸ், 28, என்பவருக்கும், சமூக வலைதளம் வாயிலாக பழக்கம் ஏற்பட்டுள்ளது.

காதல் ஜோடியாக மாறினர். திருமண ஆசை காட்டி, சென்னைக்கு வந்த அலெக்ஸ், அவருடன் நெருக்கமாக இருந்துள்ளார். இருவரும் பல இடங்களுக்குச் சென்று, தங்கள் காதலை வளர்த்துள்ளனர். அலெக்ஸ் மீண்டும் கனடா சென்று விட்டார். அப்போதுதான், அவருக்கு ஏற்கனவே திருமணமாகி, மனைவி, குழந்தைகள் இருப்பது துணை நடிகைக்கு தெரியவந்துள்ளது.

இதுகுறித்து, விருகம்பாக்கம் மகளிர் காவல் நிலையத்தில், ஏப்ரலில் புகார் அளித்தார். எஸ்.ஐ., பெனாசீர் விசாரித்தார். அப்போது, துணை நடிகையிடம் இருந்து வீட்டுக்கு தேவையான மளிகை பொருட்களை, 'ஆன்லைன்' வாயிலாக வாங்கி உள்ளார். ஏமாற்றிய காதலனை கம்பி எண்ண வைக்கிறேன் எனக்கூறி, சிறுக சிறுக பல லட்சம் ரூபாய் கறந்துள்ளார்.

அதேபோல, கனடாவில் உள்ள அலெக்சிடமும், 'உன்னை கைது செய்யாமல் இருக்க பணம் வேண்டும்' என, பல லட்சம் ரூபாயை சுருட்டி உள்ளார்.

ஆனால், அதிகாரிகளிடம் நடவடிக்கை எடுத்து வருவது போல கணக்கு காட்ட, அலெக்ஸ் மீது வழக்குப்பதிவு செய்து, 'லுக் அவுட்' நோட்டீஸ் வழங்க செய்துள்ளார்.

சென்னை வந்த அலெக்ஸ், நீதிமன்றத்தில் முன்ஜாமின் பெற்று, மீண்டும் கனடா சென்றுள்ளார். அதுபற்றி, சமூக வலைதளத்திலும் பதிவு செய்துள்ளார்.

இதை பார்த்த துணை நடிகை அதிர்ச்சி அடைந்தார். அலெக்ஸ் மீது நடவடிக்கை எடுக்காதது பற்றி, பெனாசீரிடம் கேட்டுள்ளார்; தகுந்த பதில் இல்லை. இதனால், மேற்கு மண்டல இணை கமிஷனர் திஷா மிட்டலிடம் புகார் அளித்துள்ளார்.

இதையடுத்து, பெனாசீர் மீதான குற்றச்சாட்டுகள் குறித்து விசாரிக்குமாறு, விருகம்பாக்கம் உதவி கமிஷனர் பாலகிருஷ்ண பிரபுவுக்கு உத்தரவிட்டார். பாலகிருஷ்ண பிரபு, துணை நடிகையை தன் அலுவலகத்திற்கு அழைத்து விசாரித்துள்ளார்.

அப்போது, பெனாசீருக்கு லட்சம் லட்சமாக பணமும், மளிகை பொருட்களும் வாங்கி கொடுத்ததற்கான ஆதாரங்களை, துணை நடிகை சமர்ப்பித்துள்ளார்.

'அந்த எஸ்.ஐ.,யை வேலையை விட்டே விரட்டுகிறேன்' என பேசி, துணை நடிகையிடம், உதவி கமிஷனர் நம்பிக்கையை ஏற்படுத்தி உள்ளார். விசாரணை என்ற பெயரில் அடிக்கடி தன் அலுவலகத்திற்கு வரவழைத்து, துணை நடிகையை தன் வசப்படுத்த முயன்றதாக கூறப்படுகிறது.

இரவு நேரங்களில், 'வாட்ஸாப்'பில் பாலுணர்வை துாண்டும் வகையிலான தகவல்களை அனுப்பி வந்தவர், ஒரு கட்டத்தில் படுக்கை அறைக்கு வருமாறு வலை வீசியுள்ளார்.

வெறுத்துப்போன துணை நடிகை, மீண்டும் இணை கமிஷனர் திஷா மிட்டலை சந்தித்து, நடந்தவற்றை விவரித்துள்ளார். வேலியே பயிரை மேய்ந்த கதையை, திஷா மிட்டல், கமிஷனர் அருணின் கவனத்திற்கு கொண்டு சென்றுள்ளார்.

துறை ரீதியான விசாரணையில், பெனாசீர், பாலகிருஷ்ண பிரபு ஆகிய இருவரும் தவறு செய்தது தெரியவந்தது. இதையடுத்து, இருவரும் காத்திருப்போர் பட்டியலுக்கு துாக்கி அடிக்கப்பட்டு உள்ளனர்.