சென்னை மாநகராட்சியின் 15 மண்டலங்களில் வாக்காளர் பட்டியல் சிறப்பு திருத்த பணி நடந்து வருகிறது. இதற்காக, வீடு, வீடாக கணக்கீட்டு படிவம் வழங்கப்பட்டு, பூர்த்தி செய்த படிவங்கள் பெறப்பட்டு வருகிறது. அவை, தேர்தல் கமிஷன் செயலியில் பதிவேற்றம் செய்யப்படுகிறது.

இப்பணிகளை மேற்கொள்ள ஓட்டுச்சாவடி அலுவலர்கள் திணறுவதால், கூடுதலாக இரண்டாம் நிலை ஓட்டுச்சாவடி நிலை அலுவலர்கள் நியமிக்கப்பட்டுள்ளனர். இவர்கள் பெரும்பாலும், தி.மு.க.,வைச் சேர்ந்தவர்களாகவே உள்ளனர்.

அவர்கள், அக்கட்சிக்கு சாதகமானவர்களுக்கு மட்டுமே முக்கியத்துவம் கொடுத்து படிவங்களை பூர்த்தி செய்து பெறுகின்றனர்.

இந்நிலையில், பூர்த்தி செய்யப்பட்ட படிவங்களை திரும்ப பெறுவதற்கான சிறப்பு முகாம், சென்னை முழுதும் நேற்று நடந்தது.

இதில், மதுரவாயல் தொகுதியில் ஓரிடத்தில் நடந்த முகாமில், தங்கள் புகைப்படங்களை ஒட்டி, பூர்த்தி செய்த படிவங்களை, ஓட்டுச்சாவடி அலுவலர்களிடம் ஒப்படைத்தனர்.

அங்கு வந்த தி.மு.க.,வினர், பூர்த்தி செய்யப்பட்ட படிவங்களை எடுத்துச்சென்று, 'ஜெராக்ஸ்' கடைகளில் நகல் எடுத்தனர். வாக்காளர்களின் தகவல்கள் திருடப்படுவதாக குற்றச்சாட்டு எழுந்துள்ளது.

இதுகுறித்து மண்டல உதவி வருவாய் அலுவலர்களிடம் கேட்டபோது, 'வாக்காளர்கள் பூர்த்தி செய்து அளித்த படிவங்களை நகல் எடுக்க வேண்டிய அவசியம் இல்லை. அதுகுறித்து விசாரித்து உரிய நடவடிக்கை எடுக்கப்படும்' என்றனர்.

இன்றும், காலை 9:00 மணி முதல் மாலை 5:00 மணி வரை, சிறப்பு உதவி முகாம் செயல்படும்.

கலெக்டர் முன் கட்சியினர் ' டிஷ்யூம்'

திருவொற்றியூர் தொகுதி, தேரடியில் உள்ள தனியார் திருமண மண்டபத்தில் எஸ்.ஐ.ஆர்., சிறப்பு கூட்டம் நேற்று நடந்தது. தேர்தல் அதிகாரி பத்மநாபன் தலைமையில் தி.மு.க., - அ.தி.மு.க., உள்ளிட்ட அரசியல் கட்சியினர் பங்கேற்றனர். திருவள்ளூர் கலெக்டர் பிரதாப் முன்னிலை வகித்தார்.

இதில், சிறப்பு தீவிர திருத்த படிவங்களை, தி.மு.க., நிர்வாகிகளே பெற்றுக் கொள்கின்றனர். ஓட்டுச்சாவடி அலுவலர்கள், படிவங்களை நேரடியாக வந்து வழங்குவதும் இல்லை; பெற்றுச் செல்வதும் இல்லை. இதனால் அ.தி.மு.க.,வினரின் படிவங்கள் முறையாக சேர்க்கப்படுவதில்லை என, அ.தி.மு.க., முன்னாள் எம்.எல்.ஏ., குப்பன் உள்ளிட்டோர் குற்றம் சாட்டினர்.

இதற்கு, மண்டலக்குழு தலைவர்கள் தனியரசு, ஆறுமுகம் உள்ளிட்டோர் எதிர்ப்பு தெரிவித்தனர். முதல்வர் ஸடாலின் அறிவுறுத்தல்படியே, 'வாக்காளர் யாரும் விடுபட்டு விடக்கூடாது. ஓட்டுச்சாவடி அலுவலரின் பணியை எளிமைபடுத்தும் நோக்கில், தி.மு.க.,வினர் இரண்டாம் நிலை பணியாளராக பணிபுரிகின்றனர்' என, தனியரசு கூறினார்.

இதனால், தி.மு.க., - அ.தி.மு.க., இடையே கடும் வாக்குவாதம் ஏற்பட்டது. கலெக்டர் பிரதாப், இருதரப்பையும் சமாதானம் செய்தார்.