மயிலாப்பூர் கபாலீஸ்வரர் கோவில் பிரம்மோத்சவத்தின் போது, 63 நாயன்மார்கள் விழாவில் பங்கேற்கும் பக்தர்களுக்கு உணவு அளிப்பதற்காக, கடந்த 1834ல் 'ரொட்டிக்காரச் சத்திரம்' என்ற அறக்கட்டளை அமைக்கப்பட்டிருந்தது.

அந்த அறக்கட்டளைக்குச் சொந்தமாக கபாலீஸ்வரர் கோவில் தெற்கு மாட வீதியில், 9,198 சதுர அடி பரப்பில் நிலம் மற்றும் கட்டடம் உள்ளது.இதில், ஒரு திருமண மண்டபமும்,மூன்று கடைகளும் உள்ளன.

அந்த நிலத்தைப் பயன்படுத்தி வந்த ஜெயசிங் என்பவர், அதை தன் மனைவி, மகன்களுக்கு எழுதி கொடுத்துள்ளார். சட்டவிரோதமாகப் பத்திரப்பதிவு செய்யப்பட்ட அறக்கட்டளைக்குச் சொந்தமான அந்த சொத்தில், ஜெயசிங்கின் குடும்பத்தினர் கட்டுமானங்கள் மேற்கொள்ள நடவடிக்கைகள் எடுத்து வருவதால், அந்த நிலத்தை மீட்கக் கோரியும், ஆக்கிரமிப்பாளர்கள் மீது நடவடிக்கை எடுக்கக் கோரியும், சென்னை ஆர்.ஏ.புரத்தைச் சேர்ந்த விவேக் என்பவர், சென்னை உயர் நீதிமன்றத்தில் மனு தாக்கல் செய்துள்ளார்.

இந்த வழக்கு, நீதிபதி பி.பி.பாலாஜி முன் விசாரணைக்கு வந்தது. அப்போது, மனுதாரர் தரப்பில் வழக்கறிஞர்கள் எம்.ஹரிஷ்குமார், ஆர்.பி.ரங்கீலா ஆஜராகினர்.

அப்போது, 'பக்தர்கள் நலனுக்காக ஒதுக்கப்பட்ட இந்த சொத்தை ஆக்கிரமித்துள்ளது சட்டவிரோதமானது. ஆக்கிரமிப்பாளர்களை அகற்றி சொத்தை மீட்க உத்தர விட வேண்டும். இதுசம்பந்தமாக, ஏற்கனவே அரசுக்கு மனு அளிக்கப்பட்டுள்ளது' என்றனர்.

இந்த வாதங்களை கேட்ட நீதிபதி, இதுதொடர்பாக, ஒரு வாரத்தில் விரிவான மனுவை, அறநிலையத்துறை இணை கமிஷனருக்கு அளிக்கும்படி மனுதாரருக்கு உத்தரவிட்டார். மேலும், மனுதாரரின் மனுவின் அடிப்படையில் விசாரணை நடத்தி, உரிய நடவடிக்கை எடுக்கும்படி அறநிலையத்துறை இணை கமிஷனருக்கு உத்தரவிட்டார்.