பெரம்பூர், பந்தர் கார்டன் ஆறுமுக முதலி தெருவைச் சேர்ந்தவர் துக்காராமுலுா. இவரது மகள் தீபிகா, 22; நர்ஸ். இவர் ஆயிரம்விளக்கு பகுதியில் உள்ள அப்பல்லோ மருத்துவமனையில் பணிபுரிந்தார்.

நேற்று காலை வேலைக்கு செல்ல, தன் 'வெஸ்பா' ஸ்கூட்டரில் ஓட்டேரி, திடீர் நகர் வழியே சென்றார். அப்போது, அதே அப்பல்லோ மருத்துவமனைக்கு ஆட்களை வேலைக்கு அழைத்துச் சென்ற 'ஈச்சர்' வேன், தீபிகா ஓட்டிச் சென்ற ஸ்கூட்டர் பின்னால் மோதியது.

இதில் நிலை தடுமாறி கீழே விழுந்த தீபிகாவின் தலையில், வேனின் முன்பக்க சக்கரம் ஏறி இறங்கியதில், சம்பவ இடத்திலேயே தலை நசுங்கி பலியானார்.

தகவல் அறிந்து வந்த கீழ்ப்பாக்கம் போக்குவரத்து புலனாய்வு பிரிவு போலீசார், உடலை மீட்டு பிரேத பரிசோதனைக்காக கீழ்ப்பாக்கம் அரசு மருத்துவமனைக்கு அனுப்பினர்.

மேலும், விபத்து ஏற்படுத்திய தஞ்சாவூரைச் சேர்ந்த வேன் ஓட்டுநரான சீனிவாசன், 29 என்பவரை கைது செய்தனர். விபத்தா அல்லது திட்டமிட்ட செயலா என போலீசார் விசாரிக்கின்றனர்.