சென்னை பெருநகர் பகுதியில் செயல்படுத்தப்படும் திட்டங்கள், பணிகள், நிர்வாக முடிவுகள் குறித்து விவாதிக்க, மூன்று மாதங்களுக்கு ஒரு முறை குழும கூட்டம் நடத்தப்படும்.

இந்த வகையில், சி.எம்.டி.ஏ., குழும கூட்டம், அதன் தலைவர், அமைச்சர் சேகர்பாபு தலைமையில் நேற்று நடந்தது.

சென்னை மேயர் பிரியா, வீட்டுவசதி வாரிய தலைவர் முருகன், வீட்டுவசதி நகர்ப்புற வளர்ச்சி துறை செயலர் காகர்லா உஷா, சி.எம்.டி.ஏ., உறுப்பினர் செயலர் பிரகாஷ், நகர், ஊரமைப்பு துறை இயக்குநர் பா.கணேசன் உட்பட உறுப்பினர்கள் மற்றும் உயர் அதிகாரிகள் பங்கேற்றனர்.

இந்த கூட்டத்தில் நில வகைப்பாடு மாற்றம், பணியாளர் நிர்வாகம், கட்டமைப்பு பணிகளுக்கான டெண்டர்கள் தொடர்பான கோப்புகள் விவாதத்துக்கு எடுத்துக் கொள்ளப்பட்டன.

இதில், நில உபயோக மாற்றம் தொடர்பாக, 25 கோப்புகளுக்கு ஒப்புதல் அளிக்கப்பட்டன. ஓய்வு பெற்ற அலுவலர்களை, ஆறு மாதம் வரை பணியில் அமர்த்தும் திட்டத்துக்கு ஒப்புதல் பெறப்பட்டது. பதவி உயர்வு கோப்புகள் குறித்து விவாதிக்கப்பட்டது.

கட்டமைப்பு திட்டங்கள் தொடர்பான டெண்டர்களுக்கு, ஒப்புதல் பெறுவதற்கான கோப்புகள் தாக்கல் செய்யப்பட்டன. இதில், பெரும்பாலான கோப்புகள் எதிர்கால வருவாயை, நிதி ஆதாரமாக வைத்து தயாரிக்கப்பட்டு இருந்தன.

அப்போது, சி.எம்.டி.ஏ.,வின் தற்போதைய நிதி நிலை நிலவரம் குறித்த விபரங்களை அளித்துவிட்டு, நிதி இருப்பு அடிப்படையில், புதிய டெண்டர்களுக்கு ஒப்புதல் அளிக்கலாம் என, நிதித்துறையின் சிறப்பு செயலர் பிரசாந்த் மு.வடநெரே தெரிவித்தார்.

இதையடுத்து, குறிப்பிட்ட சில பணிகளுக்கான டெண்டர்களுக்கு மட்டும் குழும கூட்டத்தில் ஒப்புதல் அளிக்கப்பட்டது.