கோவையில் குப்பையை தரம் பிரித்து வழங்குவதற்கும், அவற்றை நேரடியாக சேகரித்து தரம் பிரித்து, அழிப்பதற்கான நடவடிக்கைகளை, மாநகராட்சி நிர்வாகம் மேற்கொண்டது.

இருப்பினும், பெரிய கழிவுப்பொருட்களான மெத்தைகள், பழைய படுக்கைகள், சோபாக்கள், மேஜை, நாற்காலிகள் உள்ளிட்டவற்றை, பொதுமக்கள் அகற்றுவது சவாலாக இருந்து வருகிறது. பெரும்பாலானோர் இவற்றை குப்பைத் தொட்டிகள் இருக்கும் பகுதிகள் அல்லது, ஆள் ஆரவாரமற்ற பகுதிகளில் போட்டுச் செல்கின்றனர். மாநகராட்சி சார்பில், இக்கழிவுபொருட்களை சேகரிக்க பொதுமக்கள் சார்பில் கோரிக்கை விடுக்கப்பட்டது.

இதையடுத்து கோவை மாநகராட்சி சார்பில், பொதுமக்கள் வீடுகளில் இருந்து வெளியேற்றப்படும் பெரிய வீட்டு கழிவுப் பொருட்கள் ஆகியவற்றை, முறையாக அகற்ற கடந்த இரு தினங்களாக சேகரிப்பு முகாம் நடந்தப்பட்டது.

பொதுமக்களிடம் இம்முகாமுக்கு நல்ல வரவேற்பு இருந்தது. பலரும் தாங்களாக முன்வந்து கழிவுப்பொருட்களை, மாநகராட்சி ஊழியர்களிடம் கொடுத்தனர்.

இதன்படி, வடக்கு மண்டலம், 9.89, தெற்கு மண்டலத்தில் 9.05, மத்திய மண்டலத்தில், 19.70, மேற்கு மண்டலத்தில் 18.55, கிழக்கு மண்டலத்தில், 8.25 டன், என, 65.44 டன் அளவுக்கு கழிவு குப்பை சேகரிக்கப்பட்டுள்ளது.

நேற்று முன் தினம் நடந்த முகாம் வாயிலாக, 32.45 டன் கழிவு பொருட்கள் சேகரிக்கப்பட்டன. மொத்தம், 97.89 டன் கழிவுப் பொருட்கள் சேகரிக்கப்பட்டுள்ளன.

பொதுமக்களின் வரவேற்பை தொடர்ந்து, குறிப்பிட்ட தினங்களில் இதுபோன்ற கழிவு பொருட்கள் சேகரிப்பு முகாம்களை நடத்த, மாநகராட்சி நிர்வாகம் திட்டமிட்டுள்ளது.