கிணத்துக்கடவு, கொண்டம்பட்டியை சேர்ந்தவர் ஆதீஸ்வரன், 50, டிரைவர். இவர், கருத்து வேறுபாடு காரணமாக குடும்பத்தினரை பிரிந்து, கடந்த எட்டு ஆண்டுகளாக தனிமையில் வசித்து வந்தார்.

இந்நிலையில், நேற்று முன்தினம் இரவு மது அருந்தி விட்டு, பீடி புகைத்துள்ளார். அவர் வீட்டினுள் துாங்கிக்கொண்டிருந்த நிலையில், வீட்டிலிருந்து புகை வெளியேறுவதைக் கண்ட அருகில் இருந்தவர்கள், வீட்டின் கதவை தட்டிப் பார்த்தும் ஆதீஸ்வரன் திறக்காததால், கதவை உடைத்து உள்ளே சென்றனர்.

அப்போது, அவர் தீயில் கருகிய நிலையில் இருப்பதைக் கண்டு அதிர்ச்சி அடைந்தனர். உடனடியாக அவரை மீட்டு, கோவை அரசு மருத்துவமனைக்கு சிகிச்சைக்காக அனுப்பினர். மருத்துவமனையில் அனுமதிக்கப்பட்ட ஆதீஸ்வரன், சிகிச்சை பலனின்றி இறந்தார்.

இதுகுறித்து போலீசார் விசாரித்த போது, இரவில் தூங்கும் போது புகை பிடித்து விட்டு, அதை அணைக்காமல் வீசியதால், பீடியில் இருந்த நெருப்பால் போர்வையில் பற்றி எரிந்தது. மது போதை காரணமாக தீ பிடித்ததை உணராததால், உடலில் தீ பற்றியதும் தெரியவந்தது. மேலும், இந்த சம்பவம் குறித்து போலீசார் வழக்குப்பதிவு செய்து விசாரிக்கின்றனர்.