பொள்ளாச்சி நகராட்சி அவசர கூட்டம், தலைவர் சியாமளா தலைமையில் நேற்று நடந்தது. கமிஷனர் குமரன், துணை தலைவர் கவுதமன் முன்னிலை வகித்தனர்.

நகராட்சி தலைவர் பேசுகையில், 'மாற்றுத்திறனாளிகளை, நகர மன்ற நியமன உறுப்பினராக நியமித்த தமிழக முதல்வருக்கு நன்றி தெரிவித்துக்கொள்கிறேன்,' என்றார்.

சண்முகப்பிரியா (தி.மு.க.): தமிழக முதல்வர், மாற்றுத்திறனாளிகளுக்கு அங்கீகாரம் வழங்கும் வகையில், நியமன உறுப்பினராக நியமித்துள்ளார். அவர்களுக்கான அங்கீகாரம் கிடைத்ததுடன், தன்னம்பிக்கையை ஏற்படுத்தும்.

இதை தொடர்ந்து, கவுன்சிலர்கள், மாற்றுத்திறனாளிகள் நகராட்சி நியமன உறுப்பினராக நியமித்ததற்கும், துாய்மை பணியாளர்களுக்கு உணவு திட்டத்துக்கும் முதல்வருக்கு நன்றி தெரிவித்து பேசினர்.

நகராட்சி நியமன உறுப்பினர் முருகானந்தம்: மாற்றுத்திறனாளிகளாக உள்ளோருக்கு வலி, காயங்கள் உள்ளது. அவர்களை ஊக்கப்படுத்தும் வகையில், அங்கீகாரம் வழங்கிய முதல்வருக்கு நன்றி தெரிவித்துக்கொள்கிறேன்.

மாற்றுத்திறனாளிகளுக்கான ஊக்கத்தொகை, மூன்றாயிரம் ரூபாயாக உயர்த்தி வழங்க வேண்டும். 75 சதவீதம் பாதிப்புள்ள மாற்றுத்திறனாளிகளுக்கு மட்டும் ஊக்கத்தொகை வருகிறது. அது, 50 சதவீதமாக இருந்தாலும், சமூக பாதுகாப்பு திட்டத்தின் வாயிலாக ஊக்கத்தொகை வழங்க வேண்டும்.

அடையாள அட்டை புத்தகம் வாங்க கோவைக்கு செல்ல வேண்டியதுள்ளது. இதனால், மாற்றுத்திறனாளிகளுக்கு அலைச்சல் ஏற்படுகிறது. இதை தவிர்க்க, பொள்ளாச்சி அரசு மருத்துவமனையில், வாரத்தில் ஒரு நாள் அடையாள அட்டை புத்தகம் கிடைக்க வழிவகை செய்தால் பயனாக இருக்கும்.

நகராட்சி தலைவர்: மாற்றுத்திறனாளிகள் சார்பாக வைக்கப்பட்டுள்ள கோரிக்கை அரசு பார்வைக்கு கொண்டு சென்று நடவடிக்கை எடுக்கப்படும்.

இவ்வாறு, கூட்டத்தில் பேசினர்.