பொள்ளாச்சியில், பருவநிலை மாற்றங்கள், பருவமழை பொய்த்தல் காரணமாக நீர்நிலைகள் வறண்டு நிலத்தடி நீர்மட்டம், அவ்வப்போது குறைந்து விடுகிறது. எனவே, நீர்நிலைகளை முறையாக பராமரித்து பாதுகாக்க வேண்டிய கட்டாய நிலை உள்ளது. நீர்நிலை ஆக்கிரமிப்புகளை அகற்ற வேண்டியதும் மிக முக்கியமானதாகக் கருதப்படுகிறது.

இருப்பினும், சூளேஸ்வரன்பட்டி, சமத்துார் உள்ளிட்ட பகுதிகளில், துார்வாரப்படாத பல நீர் நிலைகள் ஆக்கிரமிக்கப்பட்டும், குப்பை உள்ளிட்ட கழிவுகள் கொட்டப்பட்டும் உள்ளன. மழையின்போது, நீர் நிலைகளில் தண்ணீர் தேங்காமல் வழிந்தோடுகிறது. சில இடங்களில் நீர்வழித்தடங்கள் அடைபட்டுள்ளதால், குடியிருப்பு பகுதிகளில் மழை வெள்ளம் தேங்குகிறது.

இப்பிரச்னைக்கு தீர்வு காண, அந்தந்த பகுதியில் உள்ள நீர்நிலைகள் குறித்த நில வரைபடத்தை அறிவிப்பு பலகையாக வைக்க உள்ளாட்சி அமைப்புகள் நடவடிக்கை எடுக்க வேண்டும்.

தன்னார்வலர்கள் கூறியதாவது:

நீர்நிலைகள் மற்றும் நீர்நிலைகளுக்கு செல்லும் நீர்வழிப்பாதைகள், குளக்கரைகளை ஆக்கிரமிக்கக்கூடாது என்ற சுப்ரீம் கோர்ட் வழிமுறைகள் மீறப்படுகின்றன. அதிலும், சூளேஸ்வரன்பட்டி, மாக்கினாம்பட்டியில் இருந்து வால்பாறை ரோடு வரை நீளும் நீரோடை முழுவதும், ஆக்கிரமிப்பு செய்யப்பட்டுள்ளன.

சில கிராமங்களில், குட்டையை கற்களால் மூடும் முயற்சி நடக்கிறது. வருவாய்த்துறையினர், நீர்நிலைகளை பாதுகாக்கும் பொருட்டு, நடவடிக்கை எடுக்க வேண்டும்.

குறிப்பாக, பொள்ளாச்சி வடக்கு ஒன்றியத்தில் - 27, தெற்கு ஒன்றியத்தில் - 17, ஆனைமலையில் - 22, கிணத்துக்கடவில் - 32 குளம், குட்டைகள் உள்ளன. இங்கு நில வரைபடத்தில் உள்ளது போல, அதன் அளவை சுட்டிக்காட்டி அறிவிப்பு வைக்க வேண்டும்.

இதேபோல, நீர்வழித்தடங்கள் நீளம் மற்றும் அகலத்தையும் குறிப்பிட வேண்டும். அப்போது தான், ஆக்கிரமிப்பு செய்யப்படுவது முற்றிலும் தவிர்க்கப்படும்.

இவ்வாறு, கூறினர்.