பொள்ளாச்சி தலைமை அரசு மருத்துவமனையில், 462 படுக்கை வசதிகள் உள்ளன, தினமும் 1,500க்கும் மேற்பட்ட நோயாளிகள் சிகிச்சை பெறுகின்றனர். மருத்துவமனையில் பிரசவம், எலும்பு முறிவு, காது, மூக்கு, தொண்டை மற்றும் டயாலிசிஸ் பிரிவுகளும் உள்ளன.

ஆண்கள் மற்றும் பெண்கள் மருத்துவ பிரிவு, அறுவை சிகிச்சை, குழந்தைகள் நலம், பச்சிளம் குழந்தைகள், அவசர சிகிச்சை உள்ளிட்ட பிரிவுகளில் ஈ.சி.ஜி., வசதி ஏற்படுத்தப்பட்டுள்ளது.

ஆனால், காப்பீடு திட்ட நோயாளிகளுக்கான வார்டில் ஈ.சி.ஜி., மட்டுமின்றி அவசர சிகிச்சைக்கு உண்டான எந்த உபகரணங்களை உள்ளடக்கிய வசதி ஏற்படுத்தப்படாமல் உள்ளது.

இதனால், இந்த வார்டில் சேர்க்கப்படும் நோயாளிகளுக்கு ஈ.சி.ஜி., எடுக்க, அவர்களை அவசர சிகிச்சைப் பிரிவுக்கு அழைத்து செல்ல வேண்டும். அதற்கு காலதாமதம் ஏற்படுவதால் நோயாளிகள் பாதிக்கின்றனர்.

எனவே, காப்பீடு திட்ட பயனாளிகளுக்கான வார்டில், ஈ.சி.ஜி., மற்றும் அவசர கிச்சைக்கு உண்டான அனைத்து உபகரணங்களை உள்ளடக்கிய வசதி ஏற்படுத்த கோரிக்கை விடுக்கப்பட்டுள்ளது.

நோயாளிகள் கூறியதாவது:

காப்பீடு திட்ட நோயாளிகள் பயன்பெறும் வகையில், ஆண்கள் மற்றும் பெண்களுக்கு தனித்தனியே வார்டு அமைக்கப்பட்டுள்ளது. இருப்பினும், அதற்கான கட்டமைப்பு வசதி முறையாக இல்லை.

வார்டில் அனுமதிக்கப்படும் நோயாளிகளுக்கு ரத்தத்தில் சர்க்கரை அளவு, கொழுப்பு, உப்பு, ரத்த அழுத்தம் கண்டறிய ஈ.சி.ஜி., எடுக்க முற்பட்டால், அதற்கான வசதி கிடையாது. அதற்கென, அவசர சிகிச்சைக்கு பிரிவுக்கு சென்று வர வேண்டியுள்ளது. காப்பீடு திட்ட வார்டுகளில், ஈ.சி.ஜி., மற்றும் அவசர சிகிச்சைக்கான உபகரணங்கள் அவசியமாகும்.

இவ்வாறு, கூறினர்.