தென்கரை பேரூராட்சியில், தண்ணீர் பந்தல், கிருஷ்ணாபுரம், சென்னனூர், மத்திபாளையம், கரடிமடை ஆகிய கிராமங்கள் உள்ளன. இந்த பேரூராட்சி, ஏராளமான விவசாய நிலங்களை உள்ளடக்கியதாகும்.

பேரூராட்சி நிர்வாகம், தூாய்மை பணியாளர்களைக் கொண்டு, குப்பையை சேகரித்து வருகிறது. ஆனால், அவ்வாறு சேகரிக்கும் குப்பையை, முறையாக தரம் பிரித்து, திடக்கழிவு மேலாண்மை செய்வதில்லை.

அதற்கு மாறாக, சென்னனூரில் உள்ள பொது மயானத்தில், குப்பையை கொட்டி வருகின்றனர். இதனால், மயானம் முழுவதும் குப்பை மேடாகவே காட்சியளிக்கிறது. அதோடு, அப்பகுதி முழுவதும் துர்நாற்றம் வீசுவதோடு, சுகாதார கேடும் ஏற்படுகிறது.

அப்பகுதியில், ஏராளமான விவசாய நிலம் இருப்பதால், பிளாஸ்டிக் மற்றும் பலவிதமான குப்பையை டன் கணக்கில் கொட்டி தேக்கி வைப்பதால், மண்வளமும் பாதிக்கும் நிலை ஏற்பட்டுள்ளது.

அதோடு, மயானத்தையும் மக்கள் பயன்படுத்த முடியாத நிலை உருவாகி வருகிறது. எனவே, பேரூராட்சி நிர்வாகம், முறையாக திடக்கழிவு மேலாண்மை செய்து, மயானத்தில் குவித்து வைக்கப்பட்டுள்ள குப்பையை அகற்ற வேண்டும் என, பொதுமக்கள் கோரிக்கை வைத்துள்ளனர்.