வடசித்தூரில் இருந்து காட்டம்பட்டி செல்லும் ரோட்டில் ஏராளமானோர் பயணிக்கின்றனர். இந்த வழித்தடத்தில் உள்ள மன்றாம்பாளையம் நிழற்கூரையை மக்கள் பயன்படுத்துகின்றனர்.

ஆனால், கடந்த சில நாட்களாக இரவு நேரத்தில், இந்த நிழற்கூரையில் சிலர் அமர்ந்து மது அருந்துவது, காலி மது பாட்டில்களை பயணியர் அமரும் இடத்தில் விட்டு செல்வது, பிளாஸ்டிக் டம்ளர் மற்றும் உணவு பொட்டலம் உள்ளிட்ட கழிவுகளை அங்கேயே வீசி செல்வது போன்ற செயல்களில் ஈடுபடுகின்றனர்.

மேலும், நிழற்கூரை ஓரத்தில் அதிக அளவில் பாட்டில்கள் போடப்பட்டுள்ளதால், அப்பகுதியில் கடும் துர்நாற்றம் வீசுகிறது. மக்கள் பயன்படுத்தும் நிழற்கூரையை 'பார்' போன்று பயன்படுத்துவதால், மக்கள் இங்கு அமர்வதை தவிர்த்து ரோட்டோரம் நீண்ட நேரம் கால்கடுக்க காத்திருக்கும் சூழ்நிலை உள்ளது.

எனவே, இப்பகுதி மக்கள் நலன் கருதி பொது இடத்தில் மது அருந்தும் நபர்கள் மீது போலீசார் நடவடிக்கை எடுக்க வேண்டும் என, அப்பகுதியினர் வலியுறுத்துகின்றனர்.