72வது வார்டு கவுன்சிலர் கார்த்திக் செல்வராஜ் பேசும்போது, ''பூ மார்க்கெட் முன் ரோடு மட்டுமின்றி, மார்க்கெட்டுக்குள் நடந்து செல்லும் பாதையிலும் கடைகள் போட்டுள்ளனர். பாரபட்சம் பார்க்காமல் ஆக்கிரமிப்பு அகற்ற வேண்டும்,'' என்றார்.

மாநகராட்சி கமிஷனர் சிவகுரு பிரபாகரன் பதிலளிக்கையில், ''அரசு அலுவலகங்கள், மருத்துவமனைகள், ரயில்வே ஸ்டேஷன், பஸ் ஸ்டாண்ட்டுகள் உள்ளிட்ட பொதுமக்கள் கூடுமிடங்களில் சுற்றும் தெருநாய்களை பிடித்து, பாதுகாக்க வேண்டும் என உச்சநீதிமன்றம் அறிவுறுத்தியுள்ளது. தமிழக அரசும் அறிவுறுத்தியுள்ளது. எத்தனை இடங்களில் பாதுகாப்பகம் கட்ட வேண்டும், அவற்றை பராமரிக்க எவ்வளவு நிதி தேவைப்படும் என மதிப்பீடு தயாரித்து, அரசுக்கு அனுப்ப உள்ளோம்,'' என்றார்.

மா.கம்யூ., கவுன்சில் குழு தலைவர் ராமமூர்த்தி பேசுகையில், ''செம்மொழி பூங்கா உருவாக்குவதற்கு சிரத்தை எடுத்தது போல், மூன்றாவது குடிநீர் திட்ட வினியோகத்திலும் கவனம் செலுத்த வேண்டும். சின்ன வேடம்பட்டி குளக்கரையில் சுத்திகரிப்பு நிலையம் கட்ட விவசாயிகள், பொதுமக்கள் எதிர்ப்பு தெரிவிக்கிறார்கள். மாற்று இடம் தேர்வு செய்து தருகிறோம்,'' என்றார்.

20வது வார்டு கவுன்சிலர் மரியராஜ் பேசும்போது, ''கருணாநிதி நகரில் மழை நீர் வடிகால் கட்டித் தர வேண்டும். ஆக்கிரமிப்புகளால் சுருங்கியுள்ள ஓடையை மீட்க வேண்டும்,'' என்றார்.

55வது வார்டு கவுன்சிலர் தர்மராஜ் பேசுகையில், ''வார்டுக்குள் ரோடு மோசமாக இருக்கிறது. 30க்கும் மேற்பட்ட ரோடு சிதிலமடைந்து காணப்படுகிறது,'' என்றார்.

ஆளுங்கட்சி கவுன்சில் குழு தலைவர் கார்த்திகேயன் பேசும்போது, ''துாய்மை பணியாளர்களின் வருகை நேரத்தை மாற்றியமைக்க வேண்டும். காலை 6 மணிக்கு வருவதற்கு சிரமப்படுகின்றனர்,'' என்றார்.

58வது வார்டு கவுன்சிலர் சுமித்ரா, ''மூன்று வீதிகளில் தலா இரண்டு வீதம் புதிதாக தெருவிளக்குகள் அமைக்க வேண்டும்,'' என்றார்.

15வது வார்டு கவுன்சிலர் சாந்தாமணி, ''மோட்டார் 'ஆப்' ஆகி விடுவதால் குடிநீர் வினியோகத்தில் பிரச்னை வருவதாக தகவல் வருகிறது. விரைந்து தீர்வு காண வேண்டும், இவ்வாறு, கவுன்சிலர்கள் பேசினர்.