திருவண்ணாமலை மாவட்டம், சேத்துப்பட்டு கண்ணனுார் கிராமத்தை சேர்ந்தவர் வெங்கடேஷ், 45; ஐய்யப்ப பக்தர். குருசாமி. இவரது தலைமையில் நேற்று, 39; ஆண்கள் மற்றும் 1 பெண் உட்பட, மாலையிட்ட, 40 ஐய்யப்ப பக்தர்கள் தனியார் பஸ்சில், நேற்று அதிகாலை கண்ணனுார் கிராமத்தில் இருந்து, ஐய்யப்ப கோவிலுக்கு சென்றனர்.

பஸ்சை, சிதம்பரம் கமலீஸ்வரன்கோவில் தெருவை சேர்ந்த டிரைவர் ராஜேஷ், 30; ஓட்டிச்சென்றார்.

சிதம்பரம் அடுத்த பு.முட்லுார் வெள்ளாற்று பாலம் நான்கு வழிச்சாலை அருகே காலை 5;30 மணியளவில் பஸ் வந்த போது, டிரைவரின் கட்டுப்பாட்டை இழந்து பஸ் , வெள்ளாற்று பாலம் தடுப்பு கட்டையில் மோதி, தடுப்பு கட்டை மேலே இழுத்து சென்று மின்சார கம்பத்தில் மோதி அந்தரத்தில் தொங்கிய படி நின்று விட்டது. இதனால் அதிர்ச்சியடைந்த ஐய்யப்ப பக்தர்கள் கூச்சலிட்டனர். உடன் அருகில் இருந்த பொதுமக்கள் அவர்களை காப்பாற்ற முயன்றனர். ஆனால், பஸ் அந்தரத்தில் தொங்கிய படியே நின்றதால் அவர்களால் ஒன்றும் செய்ய முடியவில்லை.

தகவலறிந்த, டி.எஸ்.பி., பிரதீப், இன்ஸ்பெக்டர் ஜெர்மின் லதா உள்ளிட்ட போலீசார் மற்றும் பரங்கிப்பேட்டை தீயணைப்பு படையினர், சம்பவ இடத்திற்கு விரைந்து சென்று ஐய்யப்ப பக்தர்களை மீட்டனர்.

மேலும், விபத்தில் படுகாயமடைந்த, 19 பேரை, சிதம்பரம் அண்ணாமலைநகரில் உள்ள கடலுார் அரசு மருத்துவக்கல்லுாரி மருத்துவமனையில் சேர்த்தனர். அங்கு அவர்களுக்கு சிகிச்சை அளிக்கப்பட்டு வருகிறது. இதுகுறித்து, பரங்கிப்பேட்டை போலீசார் வழக்குப் பதிந்து, விசாரித்து வருகின்றனர்.

பெரும் விபத்து தவிர்ப்பு

இந்த பஸ், பு.முட்லுார் வெள்ளாற்று பாலம் தடுப்பு கட்டையில் மோதிய வேகத்தில், அதன் மேலே இழுத்து சென்று, மின்சார கம்பத்தில் மோதி அந்தரத்தில் தொங்கிய படி நின்றது.பஸ், தடுப்பு கட்டை 'மின்சார கம்பத்தில்' மோதி நிற்காவிட்டால், வெள்ளாற்றில் கவிழ்ந்து, மிகப்பெரிய விபத்தை ஏற்படுத்திருக்கும். அதிஷ்டவசமாக பக்தர்கள் உயிர்தப்பினர்.