திருவண்ணாமலை மாவட்டம், சேத்துப்பட்டு, கண்ணனுார் கிராமத்தை சேர்ந்தவர் வெங்கடேஷ், 45; அய்யப்ப பக்தர்.

குருசாமியான இவரது தலைமையில் 39 ஆண் பக்தர்கள், ஒரு பெண் பக்தை உட்பட, மாலை அணிந்து விரதமிருந்த, 40 அய்யப்ப பக்தர்கள், தனியார் பஸ்சில், நேற்று அதிகாலை கண்ணனுார் கிராமத்தில் இருந்து சபரிமலைக்கு புறப்பட்டனர்.

பஸ்சை, சிதம்பரம் கமலீஸ்வரன்கோவில் தெருவை சேர்ந்த ராஜேஷ், 30, என்பவர் ஓட்டிச் சென்றார்.

சிதம்பரம் அடுத்த பு.முட்லுார் வெள்ளாற்று பாலம் நான்கு வழிச்சாலை அருகே காலை, 5:30 மணியளவில் பஸ் வந்த போது, டிரைவரின் கட்டுப்பாட்டை இழந்து, வெள்ளாற்று பாலம் தடுப்பு சுவரில் மோதி, தடுப்பு சுவரை உடைத்து சென்றவாறு, மின் கம்பத்தில் மோதி அந்தரத்தில் தொங்கிய படி நின்றது.

அதிர்ச்சியடைந்த பக்தர்கள் கூச்சலிட்டனர். அருகில் இருந்த பொதுமக்கள் அவர்களை காப்பாற்ற முயன்றனர். பஸ் அந்தரத்தில் தொங்கிய படியே நின்றதால் அவர்களால் ஒன்றும் செய்ய முடியவில்லை.

தகவலறிந்த டி.எஸ்.பி., பிரதீப், இன்ஸ்பெக்டர் ஜெர்மின் லதா உள்ளிட்ட போலீசார் மற்றும் பரங்கிப்பேட்டை தீயணைப்பு படையினர் சம்பவ இடத்திற்கு விரைந்து, பஸ்சுக்குள் சிக்கி தவித்த பக்தர்களை பத்திரமாக மீட்டனர்.

விபத்தில் படுகாயமடைந்த, 19 பேரை, சிதம்பரம் அண்ணாமலை நகரில் உள்ள கடலுார் அரசு மருத்துவக்கல்லுாரி மருத்துவமனையில் சேர்த்தனர்.

அங்கு அவர்களுக்கு சிகிச்சை அளிக்கப்பட்டு வருகிறது. பரங்கிப்பேட்டை போலீசார் வழக்கு பதிந்து விசாரித்து வருகின்றனர்.