கலெக்டர் அலுவலக செய்திக்குறிப்பு:

தமிழ்நாடு அரசு, குறு, சிறு மற்றும் நடுத்தரத்தொழில் நிறுவனங்கள் துறை மூலம் மகளிரை ஊக்குவிக்கும் வகையிலும், தொழில் முனைவோர்களாக உருவாக்கிடும் நோக்கத்துடனும் மகளிர் தொழில்முனைவோர் மேம்பாட்டுத் திட்டம் என்ற திட்டம், 2025-26 முதல் செயல்படுத்தப்படும் என தமிழக அரசு ஆணை வெளியிடப்பட்டுள்ளது.

இத்திட்டத்தின் கீழ் அடுத்த 5 ஆண்டுகளில் ஒரு லட்சம் மகளிரை தொழில் முனைவோராக்கிட திட்டமிடப்பட்டுள்ளது.

இத்திட்டத்தின் கீழ் உற்பத்தி, சேவை மற்றும் வியாபாரம் தொடர்பான தொழில் துவங்க மேம்பட்ட பயிற்சியுடன், தொழில் புரிய 10 லட்சம் ரூபாய் வரை பிணையமில்லாமல் மானியத்துடன் கூடிய கடனுதவி வங்கிகள் மூலம் வழங்கப்படும்.

கடன் தொகையில் 25 சதவீதம் மானியமாக வழங்கப்படும். வயது வரம்பு 18 முதல் 55 வயதுக்கு உட்பட்டவராக இருத்தல் வேண்டும்.

குறைந்தபட்ச கல்வித் தகுதியோ, வருமான வரம்போ இல்லை. ஆதி திராவிடர், மாற்றுத் திறனாளிகள், கைம்பெண்கள், ஆதரவற்ற பெண்கள், திருநங்கைகள் மற்றும் வறுமைக்கோட்டிற்கு கீழுள்ள பெண்களுக்கு முன்னுரிமை அளிக்கப்படும்.

நேரடி வேளாண்மை, கால்நடை வளர்ப்பு மற்றும் பாலிசி 2021-ல் குறிப்பிட்ட தகுதியற்ற தொழில்கள் தவிர அனைத்து விதமான தொழில்களும் துவங்கலாம்.

இத்திட்டத்தின் கீழ், சுற்றுச்சூழலுக்கு உகந்த தொழில்கள், கைவினை தொழில்கள், குழந்தைகள் பராமரிப்பு மையம், மெய்நிகர் சமையலறை அழகு நிலையம், யோகா ஸ்டூடியோ, செல்லப்பிராணிகள் பராமரிப்பு, துணி வெளுத்தல், ஊட்டச்சத்து நிபுணர், ஊட்டச்சத்து பொருட்கள் தயாரிப்பு, சிறுதானிய ஐஸ்கிரீம், மூலிகை நறுமண எண்ணெய், மண்ணில்லா வேளாண்மை ஆகிய தொழில்களுக்கு விண்ணப்பங்கள் வரவேற்கப்படுகிறது.

இத்திட்டத்தின் கீழ் விண்ணப்பிக்க தனி நபரின் புகைப்படம், ஆதார் அட்டை, ரேஷன் அட்டை, வங்கி கணக்கு புத்தகம், பான் கார்டு எண்ணுடன் கூடிய விலைப்புள்ளி ஆகியவற்றுடன் இணையதளத்தில் விண்ணப்பங்களை பதிவு செய்யலாம்.

மேலும் தகவல் பெற விரும்பினால் , பொது மேலாளர், மாவட்ட தொழில் மையம், சிட்கோ தொழிற்பேட்டை, செம்மண்டலம், கடலுார் - 607 001 அலுவலகத்தை நேரடியாகவோ அல்லது 04142-290116 என்ற தொலைபேசி எண் வாயிலாகவோ தொடர்பு கொள்ளலாம்.

இவ்வாறு அதில் கூறப்பட்டுள்ளது.