திருச்சி திண்டுக்கல் இடையே இருந்த மீட்டர்கேஜ் ரயில் பாதையில் கல்பட்டிசத்திரம் அய்யலுார் இடையே இரண்டு இடங்கள் மேடாக இருந்தது. இன்ஜின்கள் சரக்கு பெட்டிகளை இழுக்க முடியாமல் திணறியதுடன் கூடுதல் எரிபொருள், தண்டவாள தேய்மானம் ஏற்பட்டது.

இப்பிரச்னையை தீர்ப்பதற்காக 1998ல் அகலப்பாதையாக மாறியபோது பழைய தடத்திற்கு பதிலாக குமரம்பட்டியை சுற்றி 5.5 கி.மீ., துாரம் புதிய வழித்தடம் உருவாக்கப்பட்டது.

இங்கு அதிக பட்சமாக 150 அடி அகலம், 80 அடி ஆழம் வரை பள்ளம் தோண்டி ரயில் பாதை அமைக்கப்பட்டுள்ளது. ரயில் பாதைக்கு மேலே நீர் வழிப்பாலங்களும், ரயில் பாதை மட்டத்தில் ஓடை செல்லுமிடங்களில் நீர்வழி புதைப் பாலங்களும் உள்ளன.

தற்போது 'டிட்வா' புயல் காரணமாக திண்டுக்கல் திருச்சி மாவட்ட பகுதியிலும் தொடர்ந்து மழை பெய்வதால் தண்டவாளப் பகுதிக்குள் கற்கள் விழுதல், நீர் புகுதல் போன்றவற்றை கண்காணிக்கப்பதற்காக கூடுதல் ஊழியர்கள் நியமிக்கப்பட்டு கண்காணிப்பு தீவிரமாக்கப்பட்டுள்ளது.

வேகம் குறைத்து அதிக கவனத்துடன் ரயில்களை இயக்கும்படியும் டிரைவர்களை அறிவுறுத்தி உள்ளனர்.