தென்மேற்கு வங்கக்கடலில் உருவாகி உள்ள டிட்வா புயல் காரணமாக தமிழகத்தில் கடலோர மாவட்டங்களில் மிக கனமழை பெய்யும் என வானிலை ஆய்வு மையம் எச்சரித்து உள்ளது. மேலும் திண்டுக்கல் உள்பட பல்வேறு மாவட்டங்களில் மழை, வெள்ள அபாய எச்சரிக்கையும் விடப்பட்டுள்ளது. திண்டுக்கல்லில் தொடர் மழையால் மக்கள் இயல்பு வாழ்க்கை பாதிக்கப்பட்டுள்ளது. பகலில் வெயில் தெரியாத அளவிற்கு பனி சூழ்ந்து குளிரும் நிலவுகிறது. சிறு வியாபாரிகள், சந்தை விவசாயிகள் தினசரி வருமானத்தை இழந்துள்ளனர். சாலை பள்ளங்களில் மழை நீர் தேங்கி உள்ளது. பள்ளம் இருப்பது தெரியாமல் வரும் டூவீலர் ஓட்டிகள் விபத்தில் சிக்கும் நிலை ஏற்பட்டுள்ளது. மழையால் கொடைக்கானலில் மரம் முறிந்து விழுந்தது. இதனால் போக்குவரத்தும் பாதித்தது.கனமழை காரணமாக நவ.24ல் சில பள்ளிகளுக்கு விடுமுறை விடப்பட்டிருந்தது. நேற்று (நவ.29 ) அதற்கான இழப்பீட்டு வேலை நாளாக பள்ளிகள் செயல்படும் என அறிவிக்கப்பட்டிருந்தது.ஆனால் புயல் எச்சரிக்கை காரணமாக தமிழக அரசின் உத்தரவுப்படி அனைத்து பள்ளிகளுக்கும் நேற்று விடுமுறை விடபட்டதால் பள்ளி வேலை நாள் மாற்றுத்தேதிக்கு ஒத்திவைக்கப்பட்டது.

வேடசந்துார்: நேற்று காலை முதல் மாலை வரை தொடர்ச்சியாக சாரல் மழை பெய்தது. மக்களின் அன்றாட பணிகள் பாதிக்கப்பட்டன. கடைவீதிகளில் கூட்டம் இல்லை. மானாவாரிப் பயிர்களுக்கு போதிய ஈரம் கிடைத்தது.

கொடைக்கானல்: டிட்வா புயலால் மேற்கு தொடர்ச்சி மலைப்பகுதியில் பரவலாக மழை பெய்து வருகிறது. கொடைக்கானல், தாண்டிக்குடியில் நேற்று முன்தினம் இரவு முதல் சூறாவளியுடன் மிதமான மழை பொய்தது.

வார விடுமுறைக்காக வந்த சுற்றுலா பயணிகள் விடுதிகளிலே முடங்கினர். நகரை பனிமூட்டம் சூழ்ந்ததால் வாகனங்கள் முகப்பு விளக்கை எரிய விட்டு சென்றன. படகு சவாரி நிறுத்தப்பட்டது. முக்கிய சுற்றுலா தலங்கள் வெறிச்சோடின.

மாவட்டத்தில்

மழையளவு விபரம் (மி.மீ.,ல்)

பிரையன்ட் பூங்கா ↔-15.60

திண்டுக்கல் ↔-2.80

காமாட்சிபுரம் ↔-2.20

நத்தம் ↔- 4

சத்திரபட்டி ↔- 2

வேடசந்துார் ↔ -3.20

புகையிலை நிலையம் ↔- 3.20

பழநி ↔- 1

ரோஸ் கார்டன் ↔- 8