கள்ளக்குறிச்சி மாவட்டத்தின் பிரதான தொழில் விவசாயம். கரும்பு, மக்காசோளம், நெல், உளுந்து, மரவள்ளி, மஞ்சள் உட்பட பல்வேறு வகை பயிர்கள் பயிரிடப்படுகிறது. வடக்கிழக்கு பருவ மழை காலங்களில் மழை வெள்ளம் மற்றும் புயல் காரணமாக ஆயிரக்கணக்கான ஏக்கர் பரப்பளவிலான விவசாய நிலங்கள் நீரில் மூழ்கி சேதமடைவது வாடிக்கையாகி விட்டது.

இந்நிலையில் 'டிட்வா' புயல் காரணமாக கள்ளக்குறிச்சி மாவட்டத்திற்கு இன்று (29 ம் தேதி) ஆரஞ்சு அலர்ட் விடுக்கப்பட்டுள்ளது. அதிகளவிலான மழை பெய்யும் என்பதால் பயிர்களை பாதுகாக்க விவசாயிகள் மேற்கொள்ள வேண்டிய நடவடிக்கைகள் தொடர்பாக அறிவுறுத்தப்பட்டுள்ளது.

இதுகுறித்து கலெக்டர் பிரசாந்த் வெளியிட்டுள்ள செய்தி குறிப்பு;

பயிர் சாகுபடி வயல்களில் அதிக நீர் தேங்கினால் வடிகால் வாய்க்கால் அமைத்து உடனடியாக வெளியேற்ற வேண்டும். மழை வெள்ளத்தால் பாதித்த பயிர்களுக்கு மேல் உரமாக தரைத்சத்து மற்றும் சாம்பல் சத்தினை 25 சதவீதம் கூடுதலாக அளிக்க வேண்டும். நுண்ணுட்ட சத்து குறைபாடு காணப்பட்டால் இலைவழி ஊட்டம் அளிக்க வேண்டும். பூச்சி மற்றும் நோய் தாக்குதலை கூர்ந்து கவனிக்க வேண்டும்.

நெற்பயிர் நீரில் மூழ்கி பாதித்தால் ஊட்டச்சத்து பற்றாக்குறை ஏற்பட வாய்ப்புள்ளது. இதனை நிவர்த்தி செய்ய ஏக்கருக்கு 22 கிலோ யூரியா மற்றும் 18 கிலோ ஜிப்சத்துடன் 4 கிலோ வேப்பம் புண்ணாக்கு கலந்து ஒரு இரவு முழுவதும் வைத்து, வயலில் தண்ணீர் வடிந்தவுடன் ஈட வேண்டும். தொடர்ந்து போதிய சூரிய வெளிச்சம் தென்பட்டவுடன் ஏக்கருக்கு 2 கிலோ யூரியாவுடன், ஒரு கிலோ ஜிங்க் சல்பேட் உரத்தினை 200 லிட்டர் தண்ணீரில் கரைத்து கைத் தெளிப்பான் மூலம் இலை வழியாக உரமாக தெளிக்க வேண்டும்.

தண்டு உருளும் பருவம் மற்றும் பூக்கும் பருவத்தில் 4 கிலோ டிஏபி உரத்தினை 10 லிட்டர் தண்ணீரில் முதல் நாள் ஊரவைத்து மறுநாள் வடிகட்டி, கரைசலுடன் 2 கிலோ யூரியா மற்றும் ஒரு கிலோ பொட்டாஷ் உரத்தினை 200 லிட்டர் தண்ணீரில் கலந்து மாலை வேலையில் தெளிக்க வேண்டும். இதன் மூலம் மகசூல் இழப்பில் இருந்து நெற்பயிரினை காப்பாற்ற முடியும்.

பூச்சி தாக்குதல் பொருளாதார சேத நிலைக்கு மேல் போகும்போது வேம்பு சார்ந்த மருந்துகளை வேளாண் துறையின் பரிந்துரையின் படி உபயோகிக்க வேண்டும்.

அதேபோல் நீரில் மூழ்கிய உளுந்து பயிருக்கும் ஊட்டச்சத்து பற்றாக்குறை ஏற்பட வாய்ப்புள்ளது. சூரிய வெளிச்சம் தென்பட்டதும் ஏக்கருக்கு 2 கிலோ யூரியாவுடன், ஒரு கிலோ ஜிங்க் சல்பேட் உரத்தினை கலந்து 200 லிட்டர் தண்ணீரில் கரைத்து கைத் தெளிப்பான் மூலம் இலை வழி உரமாக தெளிக்க வேண்டும்.

மழை வெள்ளத்தில் பயிர்கள் நீரில் மூழ்கிய நிலையில், பின்னர் அதனை பாதுகாக்க மேற்கொள்ள வேண்டிய வழிமுறைகள் குறித்து விவசாயிகள் தங்களது பகுதிகளுக்குட்பட்ட வேளாண்மை துறை அலுவலர்களிடம் கேட்டறிந்து பயன்பெறலாம் என தெரிவிக்கப்படுகிறது.