இங்கு சங்கராபுரம், சின்னசேலம், தியாகதுருகம், ரிஷிவந்தியம், கச்சிராயபாளையம், கல்வராயன்மலை, எலவனாசூர்கோட்டை உள்ளிட்ட பல்வேறு பகுதிகளைச் சேர்ந்த 1,500க்கும் மேற்பட்ட மாணவ மாணவிகள் பயின்று வருகின்றனர்.

தற்போது சோமண்டார்குடி கோமுகி ஆற்றின் அருகே புதிய கட்டடத்தில் அரசு கலை மற்றும் அறிவியல் கல்லுாரி செயல்படுகிறது. இக்கல்லுாரியில் வெளியூர்களைச் சேர்ந்த ஏராளமான மாணவ மாணவிகள் பலர் படித்து வருகின்றனர்.

அரசு கல்லுாரிக்கு சென்று வர அவ்வழித்தடத்தில் போதிய பஸ் வசதி இல்லாததால், மாணவர்கள் பாதிப்புக்குள்ளாகினர். இதனையடுத்து பல்வேறு கோரிக்கைக்கு பின்பு காலை, மாலை என இரு வேலை குறிப்பிட்ட நேரத்திற்கு மட்டும் அரசு பஸ் இயக்கப்படுகிறது. இருப்பினும் அவை போதுமானதாக இல்லாததால், மாணவர்கள் பெரும் பாதிப்புக்குள்ளாகி வருகின்றனர்.

பெரும்பாலான மாணவர்கள் கள்ளக்குறிச்சி - கச்சிராயபாளையம் செல்லும் பஸ்சில் சென்று, காரனுார் பஸ் ஸ்டாப்பில் இறங்கி அங்கிருந்து 2 கி.மீ., துாரம் ஏரி மற்றும் வயல்வெளிக்கு மத்தியில் உள்ள சாலை வழியாக நடந்து செல்கின்றனர்.

அதேபோல் சங்கராபுரம் மார்க்கத்திலிருந்து வரும் மாணவர்கள் ரோடுமாந்துார் பஸ் ஸ்டாப்பில் இறங்கி, அங்கிருந்து மோ.வன்னஞ்சூர், மோகூர் வழியாக சோமண்டார்குடி கோமுகி ஆற்றை கடந்து கல்லுாரிக்கு செல்கின்றனர்.

மழை காலங்களில் ஆற்றில் அதிகளவு தண்ணீர் செல்லுபோது நீண்டதுாரம் சுற்றி செல்ல நேரிடுகிறது. அதேபோல் வெயில் காலங்களிலும் கடும் சிரமத்திற்குள்ளாகி வருகின்றனர்.

ஊருக்கு ஒதுக்கப்புறமாக கட்டிய கல்லுாரிக்கு போதிய பஸ் வசதி இல்லாததால், மாணவர்கள் கடும் அவதிக்குள்ளாகி வருகின்றனர். எனவே, கிராமப்புறங்களில் இருந்து படிக்கும் மாணவர்களின் நலன் கருதி கல்லுாரிக்கு போதிய பஸ் வசதி ஏற்படுத்த மாவட்ட நிர்வாகம், போக்குவரத்து துறை நடவடிக்கை எடுக்க வேண்டும்.