இத்தொழிற்சாலைகளில் இருந்து லோடு ஏற்றிச்செல்லும் ஆயிரக்கணக்கான கனரக வாகனங்கள், பழவேரி மற்றும் பினாயூர் மலையடிவாரம் வழியாக, திருமுக்கூடல் பாலாற்று பாலம் கடந்து, பல்வேறு பகுதிகளுக்கு சென்று வருகின்றன.

இரவு, பகலாக இயங்கும் கனரக வாகனங்களால், கிராம சாலைகள் மற்றும் திருமுக்கூடல் பாலம் அடிக்கடி பழுதடைந்து ஆங்காங்கே குண்டும், குழியுமாக மாறுகிறது. மேலும், மண், ஜல்லி, எம் - -சாண்ட் போன்றவற்றை ஏற்றி செல்லும் சில லாரி தார்ப்பாய் மூடாமல் இயங்குகின்றன.

இதனால், லாரிகளில் இருந்து கீழே கொட்டும் ஜல்லி கற்கள், எம் - சாண்ட், மண் போன்றவை பாலத்தின் மீது சிதறி மண் புழுதி பரவுவதோடு, இருசக்கர வாகனங்கள் விபத்துக்கு உள்ளாகின்றன. பாலத்தின் மீது இதுவரை மின்விளக்கு வசதி இல்லாததால், இரவு நேரங்களில் வாகன ஓட்டிகள் கடும் அவதிப்பட்டு வருகின்றனர். இவை ஒருபுறமிருக்க கனரக வாகனங்கள் அதிவேகமாகவும், போக்குவரத்து விதிகளை மீறியும் இயக்கப்படுவதால், விபத்துகள் தொடர்ந்த வண்ணம் உள்ளது.

கடந்த மாதம் 14ம் தேதி திருமுக்கூடல் பாலம் மீது அரசு பேருந்து மோதி 10 பேர் காயம் அடைந்தனர். அதை தொடர்ந்து, இருமுறை இருசக்கர வாகன ஓட்டிகள் அப்பகுதியில் விபத்திற்குள்ளாகினர்.

கடந்த 25ம் தேதி, பாலத்தின் மீது டூ - வீலரில் சென்ற திருமுக்கூடலை சேர்ந்த கட்டட மேஸ்திரி சக்திவேல் 34, லாரி மோதி சம்பவ இடத்திலேயே இறந்தார்; மற்றொருவர் படுகாயமடைந்தார்.

இந்த விபத்தால் அன்று இரவு ஆர்ப்பாட்டத்தில் ஈடுபட்ட அப்பகுதி மக்கள், திருமுக்கூடல் பாலம் வழியாக கனரக வாகங்கள் இயக்கக்கூடாது என, போர்க்கொடி உயர்த்தினர்.

இதையடுத்து, திருமுக்கூடல் பாலம் வழியாக மூன்று நாட்களாக கனரக வாகனங்கள் இயங்காமல் தடை செய்து, போலீசார் பாதுகாப்பு பணியில் ஈடுபடுத்தப்பட்டனர்.

இதனால், தொழில் பாதிப்பதாகவும், கனரக வாகனங்கள் மீண்டும் இயக்க நடவடிக்கை தேவை என, கல்குவாரி மற்றும் கிரஷர் உரிமையாளர்கள் சாலவாக்கம் காவல் நிலையத்தில் முறையிட்டனர்.

அதன்படி, சாலவாக்கம் காவல் நிலையத்தில் நேற்று இன்ஸ்பெக்டர் பாலசந்திரன், உதவி ஆய்வாளர் அரி ஆகியோர் முன்னிலையில், கல் குவாரி உரிமையாளர்கள் மற்றும் திருமுக்கூடல், பழவேரி, சிறுதாமூர், சிறுமையிலுார், பினாயூர், பழையசீவரம் ஆகிய ஊராட்சி தலைவர்கள் மற்றும் அப்பகுதி மக்கள் ஒருங்கிணைந்த முத்தரப்பு பேச்சு நடந்தது.

அடிக்கடி விபத்துகள் ஏற்படும் திருமுக்கூடல் பாலம் மீதும், கிராம சாலைகளிலும் பாதுகாப்பு வசதிகள் ஏற்படுத்துதல் குறித்து விவாதிக்கப்பட்டது.

சாலைகளில் புழுதி பரவுதல், அதிவேகம் மற்றும் அதிகபாரம் ஏற்றி வாகனங்கள் விதிமீறுதல், மாணவ, மாணவியர், பொதுமக்களுக்கு ஏற்படும் பாதிப்புகள் குறித்தும் பல கோரிக்கைகளை முன் வைத்தும் ஊராட்சி தலைவர்கள் பேசினர். அவர்களது கோரிக்கைகளை ஏற்ற கல் குவாரி உரிமையாளர்கள், பாதுகாப்பு குளறுபடிகள் ஏற்படாத வகையில், சிறப்பு கவனம் செலுத்துவதாக உறுதி அளித்தனர்.

கூட்டத்தில் எடுக்கப்பட்ட முடிவுகள் குறித்து, இன்ஸ்பெக்டர் பாலசந்திரன் கூறியதாவது:

திருமுக்கூடல் சுற்று வட்டார கிராமங்களில், 'பீக் ஹவர்' எனப்படும் அலுவலக நேரமான, காலை 7:00 - 9:00 மணி; மாலை 4:00 - 6:00 மணி வரை, கனரக வாகனங்கள் இயக்க தடை செய்யப்பட்டுள்ளது. இந்த விதிமுறை இன்றே அமலுக்கு வருகிறது.

பழவேரி துவங்கி பினாயூர் மலை வழியாக திருமுக்கூடல் பாலம் வரை குண்டும், குழியுமாக உள்ள சாலையை சீரமைத்து தர கல் குவாரி உரிமையாளர்கள் ஒப்புதல் அளித்துள்ளனர்.

திருமுக்கூடல் பாலத்தின் மீது மின் விளக்கு வசதி மற்றும் 'சிசிடிவி' கேமரா அமைத்து தரவும் ஒப்புக்கொண்டுள்ளனர். ஒரு மாதத்திற்குள் இத்தகையை வசதிகளை செய்து தரப்படும் என உறுதி அளித்துள்ளனர்.

பழையசீவரம் மலை பேருந்து நிறுத்தத்தில் புறக்காவல் நிலையம் அமைக்க வேண்டும் என்ற கோரிக்கையை உயர் அதிகாரிகளிடத்தில் கலந்தாலோசித்து நடவடிக்கை எடுக்கப்படும்.

இவ்வாறு அவர் கூறினார்.