காஞ்சிபுரம் - அரக்கோணம் செல்லும் சாலையில், ஒலிமுஹமதுபேட்டை அருகில் சர்வதீர்த்த குளம் அமைந்துள்ளது. ஹிந்து சமய அறநிலையத் துறை கட்டுப்பாட்டில் உள்ள இக்குளம், ஏகாம்பரநாதர் கோவில் நிர்வாகம் சார்பில், பராமரிக்கப்பட்டு வருகிறது.

கடந்த 2011ம் ஆண்டு 45 லட்சம் ரூபாய் செலவில், குளம் துார்வாரப்பட்டு, குளத்தை சுற்றிலும் நடைபாதை, சுற்றுச்சுவருடன் கம்பி வேலி அமைக்கப்பட்டது. இந்நிலையில், சுற்றுச்சுவரின் ஒரு பகுதியில் விரிசல் ஏற்பட்டது.

எனவே, குளத்தை சீரமைக்க வேண்டும் என, அப்பகுதி மக்கள் வலியுறுத்திவந்தனர். இந்நிலையில் ஹிந்து சமய அறநிலையத்துறை, ஏகாம்பரநாதர் கோவில் நிர்வாகம் சார்பில், காஞ்சிபுரம் சர்வதீர்த்த குளம், புதுப்பொலிவு பெறும் வகையில், 34 லட்சம் ரூபாய் செலவில் சீரமைப்பு பணி தீவிரமாக நடந்து வருகிறது.

குளக்கரையின் உட்புறத்தில் உள்ள நடைபாதை சீரமைக்கப்பட்டு டைல்ஸ் பதித்தல், குளத்தின் வெளிப்புற சுற்றுச்சுவர், குளத்தின் உட்புற தடுப்பு கம்பிகள் சீரமைக்கும் பணி நடந்து வருகிறது.