உத்திரமேரூர் பேரூராட்சியில் உள்ள, 18 வார்டுகளில், 404 தெருக்களில் 40,000 பேர் வசித்து வருகின்றனர். இங்கு, கழிவு நீரை வெளியேற்ற அனைத்து தெருக்களிலும், வடிகால் வசதி ஏற்படுத்தப்பட்டுள்ளது.

தற்போது, பல இடங்களில் வடிகால்வாயில் அடைப்பு ஏற்பட்டு, கழிவுநீர் அங்கேயே தேங்கி வருகிறது. இதிலிருந்து, தொற்றுநோய் பரப்பும் கொசுக்கள் உற்பத்தியாகி வருகிறது.

இந்நிலையில், ஒரு மாதமாக அனைத்து தெருக்களிலும் கொசு மருந்து அடிக்காமல் இருப்பதால், இரவு நேரங்களில் கொசுக்களின் தொல்லை அதிகரித்து உள்ளது. டெங்கு, மலேரியா உள்ளிட்ட விஷக்காய்ச்சல்கள் பரவ வாய்ப்புள்ளதாக, மக்கள் தரப்பில் கூறப்படுகிறது.

இது குறித்து மக்கள் கூறியதாவது:

உத்திரமேரூர் பேரூராட்சியில், சமீப நாட்களாக கொசுத் தொல்லை அதிகரித்து வருகிறது. தற்போது, பருவமழை தொடங்கியுள்ளதால், கொசுக்களின் உற்பத்தியை குறைக்க, பேரூராட்சி நிர்வாகம் இன்னமும் கொசு மருந்து அடிக்காமல் உள்ளது.

இதனால், மக்கள் கொசுத்தொல்லையால் பாதிக்கப்பட்டு வருகின்றனர். இதை தடுக்க, அனைத்து தெருக்களிலும் வாரத்திற்கு இரு முறை, கொசு மருந்து அடிக்க, பேரூராட்சி நிர்வாகத்தினர் நடவடிக்கை எடுக்க வேண்டும்.

இவ்வாறு அவர்கள் கூறினர்.