கிண்டி, ஈஸ்வரி ரத்தினம் பகுதியை சேர்ந்தவர் ராம் நித்திஷ், 26. பொறியாளர். இவர், தன் வீட்டின் அருகே தனது 'ஸ்விப்ட்' காரை நிறுத்தியிருந்தார்.

நேற்று காலை மர்ம நபர் ஒருவர், கார் மீது திடீரென பெட்ரோல் குண்டு வீசியதால், கார் பற்றி எரிந்தது. இதைப் பார்த்து பதறியடித்து ஓடி வந்த நித்திஷ், அக்கம் பக்கத்தினர் உதவியுடன் தீயை அணைத்தார். இதில், காரின் முன் பகுதி சேதமடைந்தது.

இதுகுறித்து நித்திஷ் அளித்த புகாரின்படி, கிண்டி போலீசார், அப்பகுதியில் உள்ள கண்காணிப்பு கேமராக்களை ஆய்வு செய்து விசாரித்தனர். அதில், கிண்டி, மடுவாங்கரையை சேர்ந்த விஜயபிரபாகரன், 25, என்ற வாலிபர், பீர் பாட்டிலில் பெட்ரோல் ஊற்றி தீ வைத்து, கார் மீது வீசியது தெரிந்தது.

போலீசார் விசாரணையில், மது போதைக்கு அடிமையான இவர், இரண்டு முறை போதை மறுவாழ்வு மையத்தில் சிகிச்சை பெற்று, மனநலம் பாதிக்கப்பட்டிருந்தது தெரிந்தது. மேலும், எதற்காக பெட்ரோல் குண்டு வீசினார் என, போலீசார் விசாரிக்கின்றனர்.