ஸ்ரீபெரும்புதுாரை சுற்றியுள்ள சிப்காட் தொழில் பூங்காவில் இயங்கிவரும் ஏராளமான தொழிற்சாலைகளுக்கு செல்லும் ஊழியர்களை ஏற்றி செல்லும் தனியார் பேருந்து மற்றும் கனரக வாகனங்கள் அதிகளவில் சென்று வருகின்றன.

கடந்தாண்டு அக்., மாதம் பெய்த கனமழையில் சாலை முற்றிலும் சேதமடைந்து குண்டும், குழியுமாக மாறியதால், இவ்வழியாக செல்லும் வாகன ஓட்டிகள் அவதிஅடைந்து வந்தனர்.

மேலும், காலை, மாலை பீக்ஹவர் நேரங்களில் கடும் போக்குவரத்து நெரிசல் ஏற்பட்டு வந்தது. அதே போல், தாந்தோன்றி அம்மன் கோவில் ஆர்ச் அருகே, சாலை நடுவே பாதாள சாக்கடை 'மேன்ஹோல்' உடைந்து சேதமடைந்ததால், கார் மற்றும் இருக்கர வாகனங்கள் விபத்தில் சிக்கி வந்தன.

சேதமான சாலை மற்றும் மேன்ஹோல் மூடியை சீரமைக்க வேண்டும் என, வாகன ஓட்டிகள் தொடர்ந்து கோரிக்கை விடுத்து வந்தனர். இதையடுத்து, புதிய மேன்ஹோல் மூடியை அமைத்து, குண்டும் குழியுமான சாலையை தார் ஊற்றி நெடுஞ்சாலைத் துறையினர் சீரமைத்தனர்.