ஸ்ரீபெரும்புதுார் - குன்றத்துார் சாலையில், பட்டுநுால்சத்திரம் பகுதியில், ஸ்ரீபெரும்புதுார் வட்டார வளர்ச்சி அலுவலகம் இயங்கி வருகிறது.

இதே வளாகத்தில், ஒருங்கிணைந்த குழந்தைகள் வளர்ச்சி திட்ட அலுவலகம், ஸ்ரீபெரும்புதுார் எம்.எல்.ஏ., அலுவலகம், உட்கோட்ட உதவி செயற்பொறியாளர் அலுவலகம் உள்ளிட்டவை இயங்கி வருகின்றன.

ஸ்ரீபெரும்புதுார் ஒன்றியத்திற்குட்பட்ட 58 ஊராட்சிகளை சேர்ந்த ஏராளமான மக்கள், பல்வேறு கோரிக்கைகள் மற்றும் தேவைக்காக இங்கு வந்து செல்கின்றனர்.

இந்த அலுவலக வளாகத்தில் உள்ள காந்தி பூங்கா பராமரிப்பு இல்லாமல் செடிகள் வளர்ந்து, மக்கள் பயன்படுத்த முடியாமல் உள்ளது.

இதனால், கொசு உற்பத்தி அதிகரித்து, அலுவகம் முழுதும் கொசு கடி தொல்லையில் அலுவலர்கள் அவதியடைந்து வருகின்றனர்.

மேலும், பூங்காவில் செடிகள் சூழந்து உள்ளதால், விஷ ஜந்துகள் அதிகரித்து வருகிறது. பாம்பு, பூச்சி உள்ளிட்டவை, வட்டார வளர்ச்சி அலுவக வளாகத்தில் நடமாடுவதால், மக்கள் மற்றும் அதிகாரிகள் அச்சத்தில் உள்ளனர்.

எனவே, காந்தி பூங்காவை சீரமைத்து மக்கள் பயன்பாட்டிற்கு திறக்க வேண்டும் என, சமூக ஆர்வலர்கள் கோரிக்கை விடுத்துள்ளனர்.