அலங்காநல்லுார் தேசிய கூட்டுறவு சர்க்கரை ஆலையில், தற்காலிகமாக கரும்பு அரவை நிறுத்தப்பட்டுள்ளது. அந்த ஆலைக்கு ஒதுக்கீடு செய்த பிரதான பகுதி விவசாயிகள், தஞ்சை குருங்குளம் அறிஞர் அண்ணா சர்க்கரை ஆலை அரவைக்கு கரும்புகளை அனுப்ப தமிழக அரசு தற்காலிமாக அனுமதி அளித்துள்ளது.

கலெக்டர் பிரவீன்குமார் தெரிவித்ததாவது:

அலங்காநல்லுார் சர்க்கரை ஆலை பகுதிகளில் பயிரிட்டுள்ள கரும்புகள், குருங்குளம் சர்க்கரை ஆலைக்கு கொள்முதல் செய்ய சர்க்கரைத் துறை இயக்குநர் அனுமதி அளித்துள்ளார்.

அப்பகுதி கரும்பு விவசாயிகள் 2025----26ம் அரவைப் பருவத்திற்கு தேசிய வேளாண் வளர்ச்சி திட்டம், கலைஞர் அனைத்து கிராம ஒருங்கிணைந்த வேளாண் வளர்ச்சி திட்டத்தின் கீழ் பதிவு செய்து பயனடையலாம்.

பருசீவல் நாற்று நடவு அபிவிருத்திப் பணிக்கு மானிய தொகையாக எக்டேர் ஒன்றுக்கு ரூ.15 ஆயிரத்து 625, ஒரு பரு விதைக்கரணை நேரடி நடவு அபிவிருத்திப் பணிக்கு மானிய தொகை எக்டேர் ஒன்றுக்கு ரூ. 5 ஆயிரம் வழங்கப்படுகிறது.

இவ்வாறு அவர் தெரிவித்தார்.