மதுரையில் டிச.,7 ல் முதல்வர் ஸ்டாலின் தலைமையில் 1.67 லட்சம் பயனாளிகளுக்கு நலத்திட்டம் வழங்கும் விழா உத்தங்குடியில் நடக்கிறது. இதுதொடர்பாக ஒருங்கிணைந்த மதுரை மாவட்ட தி.மு.க., ஆலோசனை கூட்டம் அமைச்சர் மூர்த்தி தலைமையில் நடந்தது. அமைச்சர் தியாகராஜன், மாவட்ட செயலாளர்கள் தளபதி எம்.எல்.ஏ., மணிமாறன் முன்னிலை வகித்தனர்.

அமைச்சர் தங்கம் தென்னரசு பேசியதாவது:

தமிழக அரசியல் களத்தின் தட்பவெட்பத்தை எப்போதும் தீர்மானிக்கும் நகராக மதுரை தான் இருக்கும். இங்கு முதல்வர் நினைப்பதை விட மூன்று மடங்கு செயலாற்றுபவராக அமைச்சர் மூர்த்தி உள்ளார். வரும் தேர்தலிலும் மாவட்டத்தின் 10 தொகுதிகளிலும் தி.மு.க., வெற்றி பெற வேண்டும். மதுரைக்கு டிச.,7 வரும் முதல்வர் ஸ்டாலின் பயணம் தமிழகத்திற்கு ஒட்டுமொத்த செய்தியை சொல்லுவதாக அமையும்.

தமிழகத்தில் சட்டசபை தேர்தல் எப்போது வேண்டுமானாலும் நடக்கட்டும். எந்த கட்சியும் எப்படி வேண்டுமானாலும் கூட்டணி வைக்கட்டும். அரசியல் புயல் எப்படி மாறி அடித்தாலும் தமிழகத்தின் அடுத்த முதல்வராகவும் ஸ்டாலின் தான் வருவார்.

இவ்வாறு அவர் பேசினார்.