பூர்த்தி செய்யப்பட்ட, எஸ்.ஐ.ஆர்., படிவங்களை திரும்ப வழங்குவதற்கான சிறப்பு முகாமில், மழை காரணமாக மக்கள் வருகை குறைந்து வெறிச்சோடி காணப்பட்டது.

இந்திய தேர்தல் ஆணையத்தின் உத்தரவுப்படி, நாமக்கல் மாவட்டத்தில் உள்ள அனைத்து சட்டசபை தொகுதிகளிலும், கடந்த, 4 முதல், 1,629 ஓட்டுச்சாவடி நிலை அலுவலர்கள், கணக்கீட்டு படிவங்களை வாக்காளர்களுக்கு வழங்கி, நிரப்பப்பட்ட படிவங்களை மீண்டும் பெற்று, பி.எல்.ஓ., ஆப் மூலம் பதிவேற்றும் பணியை மேற்கொண்டு வருகின்றனர்.

தொடர்ந்து, 'சிறப்பு தீவிர திருத்தம்--2026' தொடர்பாக, வாக்காளர்களுக்கு வினியோகம் செய்யப்பட்ட கணக்கெடுப்பு படிவங்களை, பூர்த்தி செய்து மீண்டும் ஓட்டுச்சாவடி நிலை அலுவலர்களிடம், தொடர்புடைய வாக்காளர்கள் திருப்பி வழங்க வசதியாக, கடந்த, 25 முதல், அந்தந்த ஓட்டுச்சாவடி மையங்கள், அனைத்து அரசு, அரசு உதவி பெறும் பள்ளிகள் மற்றும் அனைத்து ரேஷன் கடைகள் ஆகியவற்றில் தேவையான வசதிகள் ஏற்பாடு செய்யப்பட்டுள்ளன.

அதன்படி, நாமக்கல், கொல்லிமலை, மோகனுார் உள்ளிட்ட, 15 ஒன்றியங்களில், வட்டார கல்வி அலுவலர்கள் மூலம் அரசு, அரசு உதவிபெறும் பள்ளிகள், அரசு உயர்நிலை, மேல்நிலை பள்ளிகளில், கடந்த, 25 முதல், 27 வரை, 1,208 பூர்த்தி செய்யப்பட்ட கணக்கீட்டு படிவங்கள் பெறப்பட்டுள்ளன.

இதற்கிடையில், அனைத்து ஓட்டுச்சாவடி மையங்களிலும், நேற்று, இன்று என, இரண்டு நாட்கள், காலை, 9:00 முதல், மாலை, 5:00 மணி வரை, சிறப்பு முகாம் நடந்தது. மாவட்டம் முழுவதும் தொடர் சாரல் மழை காரணமாக, பெரும்பாலான ஓட்டுச்சாவடிகளில், வாக்காளர்கள் வரத்து குறைவாகவே காணப்பட்டது.

'பூர்த்தி செய்யப்பட்ட வாக்காளர் படிவங்களை சமர்ப்பிக்க, வரும், டிச., 4 கடைசி நாள். அதனால், வாக்காளர்கள் முன்னதாகவே கணக்கீட்டு படிவங்களை சமர்ப்பித்து, தங்களது பெயர் வரைவு வாக்காளர் பட்டியல்-2026-ல் இடம் பெறுவதை உறுதி செய்துகொள்ள வேண்டும்' என, மாவட்ட தேர்தல் அலுவலரும், கலெக்டருமான துர்கா மூர்த்தி தெரிவித்துள்ளார்.

கலெக்டர் ஆய்வு

ராசிபுரம், தேசிய பெண்கள் மேல்நிலைப்பள்ளி, அண்ணா சாலை அரசு பள்ளி, சிவானந்தா சாலை அரசு பள்ளி, தாலுகா அலுவலகம் உள்ளிட்ட இடங்களில் சிறப்பு முகாம் நடக்கிறது. நேற்று காலை முதல், வாக்காளர்கள் அதிகளவு படிவங்களை பூர்த்தி செய்து ஒப்படைத்து சென்றனர். கலெக்டர் துர்கா மூர்த்தி ஒவ்வொரு சிறப்பு முகாமிற்கும் சென்று ஆய்வு செய்தார். அப்போது அலுவலர்களின் சந்தேகங்களுக்கு பதிலளித்தார். அதுமட்டுமின்றி, இன்னும், 5 நாட்கள் மட்டுமே இருப்பதால் இப்பணியை விரைந்து மற்றும் தவறின்றி முடிக்க வேண்டும் என, அறிவுரை வழங்கினார். உடன் தாசில்தார் சசிக்குமார் உள்ளிட்ட அதிகாரிகள் இருந்தனர்.