நீலகிரி மாவட்டத்தில் உள்ள சுற்றுலா தலங்களுக்கு, கர்நாடகா மற்றும் வட மாநில சுற்றுலா பயணிகள், கூடலுார் வழியாக அதிகளவில் வந்து செல்கின்றனர். அதில், தொரப்பள்ளி - ஊசிமலை - இடையே உள்ள, 16 கி.மீ., துாரமுள்ள சாலை பல இடங்களில் சேதமடைந்துள்ளது. சாலையில் உள்ள குழிகளில் மழைநீர் தேங்கி குளம் போல மாறி, மேலும் சேதமடைந்து வருவதால், வாகனங்கள் இயக்க சிரமப்பட்டு வருகின்றனர். இச்சாலையை தரமான முறையில் சீரமைக்க அனைத்து தரப்பினரும் தொடர்ந்து வலியுறுத்தி வருகின்றனர்.

இதற்கான, நடவடிக்கை இல்லாத நிலையில், சாலையில் உள்ள குழிகளில் பாறைபொடி கலந்த ஜல்லி கற்களை கொட்டி, தற்காலிகமாக சீரமைத்து பணி நடந்து வருகிறது. இது போன்று பலமுறை சீரமைத்தும் எந்த பயனும் இல்லை.

இவை ஓரிரு வாரங்களில் மீண்டும் சேதமடையும் சூழல் உள்ளதால், சுற்றுலா பயணிகள் அதிருப்தி அடைந்துள்ளனர்.

ஓட்டுனர்கள் கூறுகையில், 'இச்சாலை கடந்த மூன்று ஆண்டுகளாக சேதமடைந்து வருகிறது. சாலையில் உள்ள குழிகள் பலமுறை தற்காலிகமாக சீரமைத்துள்ளனர். அவை மீண்டும் சேதமடைந்து வாகனங்கள் இயக்க சிரமம் ஏற்பட்டுள்ளது.

தற்போது சாலையில் ஏற்பட்ட குழிகளை தரமாக சீரமைக்காமல், தற்காலிகமாக சீரமைக்கும் பணிகளை மேற்கொண்டுள்ளனர். இவை மீண்டும் சேதமடையும் ஆபத்து உள்ளது. அதிகாரிகள் சாலையை முழுமையாக ஆய்வு செய்து, நிரந்தரமாக சீரமைக்க வேண்டும்,' என் றனர்.