நீலகிரி மாவட்டத்தின் பல்வேறு பகுதிகளிலும், 20 ஆயிரம் ஏக்கர் பரப்பளவில் மலை காய்கறி பயிரிட்டு, விவசாயிகள் பராமரித்து வருகின்றனர். நடப்பாண்டு கேரட் மற்றும் பீட்ரூட் அதிக பரப்பளவில் பயிரிடப்பட்டுள்ளது.

தற்போது, மழை பெய்து வருவதால், அறுவடைக்கு தயாரான, கேரட் மற்றும் பீட்ரூட் தோட்டங்களில் மழைநீர் தேங்கும் பட்சத்தில் பயிர் அழிந்து விடும் நிலை உள்ளது. இதனால், விவசாயிகளுக்கு அதிக இழப்பு ஏற்படுகிறது.

இந்நிலையில், தயாரான கேரட் மற்றும் பீட்ரூட் காய்கறிகள், வியாபாரிகள் வாயிலாக, கூடுதல் தொழிலாளர்களை பணிய மர்த்தி அறுவடை செய்து, கழுவி தரம் பிரித்து மேட்டுப்பாளையம் மண்டிகளில் விற்பனை செய்யப்படுகிறது.

அதிகாலையில் அறுவடை அதற்காக, ஊட்டி, கோத்தகிரி, குன்னுார் சுற்றுப்புற பகுதிகளில் மழை, பனி காலத்தை பொருட்படுத்தாமல், அதிகாலையில் அறுவடை பணியில் தொழிலாளர்கள் ஈடுபட்டு வருகின்றனர். அறுவடை செய்த, கேரட் முட்டைகளை நீர் ஆதாரமுள்ள இடங்களுக்கு கழுவுவதற்காக லாரியில் கொண்டு செல்லப்படுகிறது.

இதில், 15க்கும் மேற்பட்ட தொழிலாளர்கள், கேரட் முட்டைகளின் மேல் அமர்ந்து, பயணிக்க வேண்டிய நிலை உள்ளது. இதனால், மழை மற்றும் பனி காலத்தில் தொழிலாளர்களுக்கு பாதுகாப்பு இல்லாத நிலை உள்ளது.

கடந்த வாரம் பலர் படுகாயம் இதனை உறுதிப்படுத்தும் விதமாக, கடந்த வாரம் தேனோடு கம்பை பகுதியில் கட்டுப்பாட்டை இழந்த பெரிய வாகனம் விபத்துக்குள்ளாகி, 15 தொழிலாளர்கள் காயமடைந்த சம்பவம் நடந்துள்ளது. இதில், பலத்த காயங்களுடன் பல தொழிலாளர்கள், ஊட்டி அரசு மருத்துவக் கல்லுாரி மருத்துவமனையில் அனுமதிக்கப்பட்டு சிகிச்சை பெற்று வருகின்றனர்.

அப்போது ஆய்வு செய்த போலீசார், வட்டார போக்குவரத்து அலுவலர்கள், 'எதிர்வரும் நாட்களில், இது போன்ற ஆபத்தான பயணம் மேற்கொள்ளும் பட்சத்தில், தொழிலாளர்களின் உயிருக்கு அதிக ஆபத்து இருக்க வாய்ப்புள்ளது.

இதனால்,வாகன உரிமையாளர்கள்; டிரைவர்கள் லோடு வாகனங்களின் மீது தொழிலாளர்களை அமர வைத்து அழைத்து செல்ல கூடாது. அவ்வாறு சென்றால் நடவடிக்கை எடுக்கப்படும்,' என, அறிவுறுத்தினர்.

மீண்டும் விதிமீறிய பயணம் இந்நிலையில்,கோத்தகரி சுற்றுப்புற பகுதியில், மீண்டும் அத்து மீறல் தொடர்கிறது. பலரும் தொழிலாளர்களை கேரட், பீட்ருட் மூட்டைகளின் மீது அமர வைத்து அழைத்து செல்வது தொடர்கிறது.

இதேபோல், ஊட்டியில் சில இடங்களில் விதிமீறி நடந்து வருதாக, வட்டார போக்குவரத்து அலுவலகத்தில் போலீசாரும் தெரிவித்துள்ளனர்.

வட்டார போக்குவரத்து அலுவலர் பிரபாகரன் கூறுகையில்,''லோடு ஏற்றி செல்லும் வாகனங்களின் மீது தொழிலாளர்களை ஏற்றி செல்ல கூடாது என, பல முறை அறிவுறுத்தப்பட்டுள்ளது.

இனி வரும் நாட்களில், லாரிகளில் மீது தோட்ட தொழிலாளர்கள் மூட்டைகளின் மீது அமர்ந்து சென்றால், தலா ஒருவருக்கு, 300 ரூபாய் அபராதம் விதிக்கப்படும். லாரி டிரைவர்களின் 'லைசன்ஸ்' மூன்று மாதங்களுக்கு தற்காலிகமாக ரத்து செய்யப்படும்.

அதன்பின்பு, மீண்டும் விதிமீறல் தொடர்ந்தால், வாகன உரிமையாளர்கள் மீதும் சட்டபடி நடவடிக்கை எடுக்கப்படும். எனவே, தொழிலாளர்கள் பாதுகாப்புடன் தனி வாகனத்தில் பணிக்கு செல்வது அவசியம்,'' என்றார்.