வடகிழக்கு பருவமழை தீவிரமடைந்த நிலையில் ராமநாதபுரம் மாவட்டத்தில் கடந்த சில நாட்களாக தொடர் மழை பெய்து வருகிறது. வங்கக் கடலில் உருவான தித்வா புயல் காரணமாக நேற்றுமுன்தினம் இரவு தொடங்கிய மழை நேற்று மாலை வரை இடைவிடாமல் பெய்தது.

ராமேஸ்வரத்தில் பள்ளிகளுக்கு மட்டும் விடுமுறை அளிக்கப்பட்டது. இதனால் மற்ற பகுதிகளில் உள்ள பள்ளி, கல்லுாரிகளுக்கு செல்லும் மாணவர்கள், பணிக்கு செல்வோர் மழையில் நனைந்தபடி சென்றனர்.

ராமநாதபுரம் அரண்மனை அருகே உள்ள சந்தையில் மழையின் காரணமாக மக்களின் வருகை குறைந்து வெறிச்சோடி காணப்பட்டது. காய்கறிகள், பழங்கள், பூக்கள் குவித்து வைக்கப்பட்டிருந்தது. அரசு மருத்துவக் கல்லுாரி மருத்துவமனையில் ஆங்காங்கே தண்ணீர் தேங்கியிருந்ததால் நோயாளிகள் அவதியடைந்தனர்.

அதேபோல் நகராட்சி பஸ் ஸ்டாண்டில் இருக்கை வசதி இல்லாதது மட்டுமின்றி மக்கள் நிற்பதற்கு கூட இடம் இல்லாத நிலை உள்ளது. பஸ் ஸ்டாண்டில் உள்ள கடைகள் பாதிக்கும் மேல் நடைமேடையை ஆக்கிரமித்துள்ளனர். இதனால் மக்கள் மழைக்கு ஒதுங்க இடமின்றி மழையில் நனைந்தபடி பஸ்சுக்கு காத்திருந்தனர். பஸ்களும் நடைமேடையில் நிறுத்தாமல் நுழைவு வாயில் அருகே பயணிகளை இறக்கி விடுவதால் நனைந்தபடி சென்றனர்.

மரங்கள் சரிந்தன ராமநாதபுரம் மாவட்டத்தில் 5 க்கும் மேற்பட்ட இடங்களில் மரக்கிளைகள் முறிந்து விழுந்துள்ளன. பாம்பன் சர்ச் ரோடு பகுதியில் உள்ள வீட்டின் மீது சரிந்த மரத்தை தீயணைப்பு துறையினர் அப்புறப்படுத்தினர். ராமேஸ்வரம்--மதுரை தேசிய நெடுஞ்சாலை இடையர்வலசை பகுதியில் பலத்த காற்று வீசியதால் மரக்கிளை முறிந்து விழுந்தது. இதனால் சிறிது நேரம் போக்குவரத்து பாதிக்கப்பட்டது.