பரமக்குடியில் அழகப்பா பல்கலை மாதிரி உறுப்புக்கல்லுாரி 2012ம் ஆண்டு அரசு ஆண்கள் மேல்நிலைப் பள்ளியில் துவக்கப்பட்டது. பின்னர் ரயில்வே ஸ்டேஷன் பின்புறம் இடம் தேர்வு செய்யப்பட்டு 2017ம் ஆண்டில் புதிய கட்டடம் திறக்கப்பட்டது. 2022 முதல் அரசு மகளிர் கலை மற்றும் அறிவியல் கல்லுாரியாக மாறியது. கல்லுாரிக்கு பஸ் வசதி, குடிநீர் உள்ளிட்ட அடிப்படை வசதிகள் இல்லாமல் சுற்றுச்சுவர் கட்டப்படாமல் இருந்தது.

தொடர்ந்து தினமலர் நாளிதழ் சுட்டிக்காட்டியதன் பேரில் சுற்றுச்சுவர் கட்டும் பணிகள் நிறைவடைந்து வருகிறது. இதன்படி கல்லுாரி ஆரம்பித்த நாளில் 1500 பேர் வரை படித்த நிலையில் தற்போது மகளிர் கல்லுாரியில் வசதிகள் இன்றி 250 பேர் மட்டுமே படிக்கும் நிலை உருவாகியுள்ளது.

இதனை தொடர்ந்து நவ., 17 சென்னை கல்லுாரி கல்வி ஆணையர் சுந்தரவல்லி, 2026 --27ம் கல்வி ஆண்டு முதல் மீண்டும் இருபாலர் கல்லுாரியாக மாற்றப்படும் என்ற அரசாணையை வெளியிட்டுள்ளார்.

தொடர்ந்து 4 ஆண்டுகளாக மாணவர் சேர்க்கை 50 சதவீதத்திற்கும் குறைவாக இருப்பதால் இருபாலர் கல்லுாரியாக மாற்றப்பட்டதாக தெரிவிக்கப்பட்டுள்ளது.

வரும் ஆண்டில் குடிநீர், கழிப்பறை மற்றும் பஸ் வசதிகளை ஏற்படுத்த வேண்டும். மேலும் சமூக விரோதிகள் மது அருந்தும் நிலை அப்பகுதியில் உள்ளதால் போலீசார் ரோந்து செல்வதுடன், கல்லுாரிக்கு அருகில் புறக்காவல் நிலையம் அமைக்க நடவடிக்கை எடுக்க வேண்டும் என பெற்றோர், மாணவர்கள் கோரிக்கை விடுத்துள்ளனர்.