நரிப்பையூர் அரசு ஆரம்ப சுகாதார நிலையத்திற்கு சுற்றுவட்டார 18க்கும் மேற்பட்ட கிராமங்களில் இருந்து நாள்தோறும் புற நோயாளிகளாக ஏராளமானோர் வந்து செல்கின்றனர்.

இந்நிலையில் சித்த மருத்துவத்தின் மூலமாக மருந்து உட்கொள்ளக்கூடிய நோயாளிகள் பெருவாரியான எண்ணிக்கையில் உள்ள நிலையில் சித்தா மருத்துவ பிரிவிற்கு டாக்டர் இல்லாத நிலை தொடர்கிறது.

நரிப்பையூரைச் சேர்ந்த முன்னாள் மீனவர் மண்டல துணைத் தலைவர் செய்யது காதர் கூறியதாவது: நரிப்பையூர், கன்னிராஜபுரம், தர்மராஜபுரம், வெட்டுக்காடு உள்ளிட்ட 18 குக்கிராமங்களைச் சேர்ந்த ஏராளமானோர் ஆங்கில மருத்துவத்திற்கு மாற்றாக சித்த மருத்துவம் எடுத்து வருகின்றனர். அரசு சித்த மருத்துவத்திற்கான நிதி ஒதுக்கீடு செய்து தனியாக பராமரிக்கப்பட்டு வரும் நிலையில் ஆறு மாதங்களாக பூட்டியே வைக்கப்பட்டுள்ளது.

சித்த மருந்து மாத்திரை, சூரணம் உள்ளிட்ட மருந்து பொருட்கள் ஏராளமான பார்சல்களாக பெருமளவில் அடுக்கி வைக்கப்பட்டுள்ளது. அவற்றை உரிய முறையில் நோயாளிகளுக்கு வழங்காமல் காலாவதியாகும் அவல நிலை ஏற்பட்டுள்ளது.

எனவே சித்த மருத்துவ பிரிவிற்கான தனியாக டாக்டர் நியமிக்க மருத்துவ பணிகள் துணை இயக்குனர் நடவடிக்கை எடுக்க வேண்டும் என்றார்.