ராமநாதபுரம் மாவட்டத்தில் உள்ள அனைத்து வருவாய் கிராமங்களிலும் விவசாயிகளுக்கு அடையாள அட்டை எண் வழங்குவதற்கு கிராமங்களில் சிறப்பு முகாம்கள் நடந்தது.

விவசாயிகளுக்கு சாகுபடிக்கு தேவையான மானிய உதவிகளை மத்திய, மாநில அரசுகள் பல்வேறு மானிய திட்டங்கள் வாயிலாக வழங்குகின்றன. விவசாயிகளின் பெயர், நிலங்கள் தொடர்பான விவரங்கள் வேளாண் அடுக்ககம் என்று அலைபேசி வலைதளத்தில் ஏற்கனவே பதிவு செய்யப்பட்டுள்ளன.

தற்சமயம் மத்திய அரசின் மூலம் அடையாள எண் வழங்குவதற்கான 'பார்மர்ஸ் ரிஜிஸ்டரி' என்ற பெயரில் அலைபேசி வலைதளம் உருவாக்கப்பட்டு ராமநாதபுரம் மாவட்டத்தில் உள்ள அனைத்து வட்டாரங்களிலும் உள்ள வருவாய் கிராமங்களில் முகாம்கள் நடைபெற்று பல்வேறு விவசாயிகள் பதிவு செய்து பிரத்யேக அடையாள எண் பெற்றுள்ளனர்.

தற்போது இந்த அடையாள அட்டை எண் பயிர் காப்பீடு செய்யும் வலைதளத்தில் கட்டாயம் ஆக்கப்பட்டுள்ளது. இதனால் பிரத்யேக அடையாள எண் பதிவு செய்யாத விவசாயிகள் மற்றும் தங்கள் பெயரில் நேரடி பட்டா நிலங்கள் இல்லாமல் தனது முன்னோர்கள், தாய், தந்தையர் மற்றும் குத்தகை நிலங்களில் சாகுபடி செய்யும் விவசாயிகள் பயிர் காப்பீடு செய்ய முடியாமல் தவித்து வருகின்றனர்.