சேலம் மாநகராட்சி கூட்டம், அதன் அலுவலகத்தில் நேற்று நடந்தது. தி.மு.க.,வை சேர்ந்த, மேயர் ராமச்சந்திரன் தலைமை வகித்தார். அதில் கவுன்சிலர்கள் பேசியதாவது:

இமயவர்மன் (வி.சி.,): எஸ்.ஐ.ஆர்., பணி இன்னும்

முடியவில்லை. மாநகராட்சி அதிகாரிகள் அதற்கான படிவத்தை இன்று இரவே ஒப்படைக்க

வற்புறுத்துவதால், அதற்கான

அவகாசத்தை நீட்டிக்க, தீர்மானம் நிறைவேற்ற வேண்டும்.

முன்னதாக, 'எஸ்.ஐ.ஆர்., பெயரில் வாக்குறுதியை பறிக்காதே' என பதாகை ஏந்தியபடி, கூட்டத்தில் எதிர்ப்பை வெளிப் படுத்தினார்.

செல்வராஜ்(அ.தி.மு.க., கொறடா): எதிர்க்கட்சி தலைவர், கொறடா முறையே பேச அனுமதித்து, மேயர் முறையாக கூட்டத்தை வழிநடத்த வேண்டும்.

இதை ஏற்காத, தி.மு.க., கவுன்சிலர் தெய்வலிங்கம், இமயவர்மனுக்கு ஆதரவாக குரல் எழுப்ப, அதேநேரம் செல்வராஜ், இமயவர்மன் ஒருசேர பேச, கூட்டத்தில் சலசலப்பு உண்டானது. பின் சமாதானம் செய்யப்பட்டு இருவரும் அமரவைக்கப்பட்டனர்.

தொடர்ந்து செல்வராஜ் பேசுகையில், ''இப்போது எந்த பணிகளும் கவுன்சிலர்களுக்கு தெரிவதே இல்லை. செவ்வாய்ப்பேட்டை, சந்தைப்பேட்டை சுடுகாடு சாலையை, சந்தைப்பேட்டை பிரதான சாலை என வகைப்படுத்தி, 'ஏ கிரேடு' ஆக மாற்றியதால், குடிசையில் வசிக்கும், 102 குடும்பங்கள், பல மடங்கு வரி விதிப்புக்கு ஆளாகி வெளியேறும் சூழலில், அமைச்சர் தொகுதியில், 'அத்திப்பட்டி' சூழல் உருவாகி உள்ளது,'' என்றார்.

தெய்வலிங்கம்: செல்வராஜ், அவரது வார்டு பிரச்னையை மட்டும் பேச வேண்டும் என கூறி, எதிர்ப்பை வெளிப்படுத்தினார்.

அதை ஆமோதித்து, தி.மு.க., கவுன்சிலர்கள் சாந்தமூர்த்தி, மூர்த்தி, வி.சி., கவுன்சிலர் இமயவர்மன் ஆகியோர் பேச, மீண்டும் சலசலப்பு ஏற்பட்டது.

தொடர்ந்து, மேயரிடம் மனு அளித்த செல்வராஜை சூழ்ந்து, 3 கவுன்சிலர்களும், 'கொரோ' செய்தனர். மேலும் அமைச்சர் குறித்து பேசியதை வாபஸ் வாங்கும்படி வற்புறுத்த, அவர்களுக்குள் தள்ளுமுள்ளு ஏற்பட்டது.

மேயர் ராமச்சந்திரன்: வார்டு பிரச்னையை பேசுங்கள். அமைச்சரை ஏன் சம்பந்தப்படுத்தி பேசுகிறீர்கள். அமைச்சருக்கும், இதற்கும் என்ன தொடர்பு உள்ளது என, கேள்வி எழுப்பி, தீர்மானங்கள் நிறைவேற்றப்பட்டதாக கூற, கூட்டம் முடிக்கப்பட்டது.

தொடர்ந்து மாற்றுத்திறனாளி நியமன கவுன்சிலர் கவுதமனுக்கு, மேயர், துணை மேயர் சாரதாதேவி உள்ளிட்ட கவுன்சிலர்கள் வாழ்த்து தெரிவித்தனர்.