சேலம் மாவட்டம் வாழப்பாடி டவுன் பஞ்சாயத்து, 9வது வார்டு, பெரியசாமி நகரில், 300க்கும் மேற்பட்ட குடியிருப்புகள் உள்ளன. அப்பகுதி மக்களுக்கு, எஸ்.ஐ.ஆர்., எனும் வாக்காளர் பட்டியல் தீவிர திருத்தம் தொடர்பாக, வாக்காளர்களுக்கு விண்ணப்ப படிவங்கள் வழங்கப்பட்டன. அதில், 2002 மற்றும் 2005 வாக்காளர் பட்டியலில், அப்பகுதியை சேர்ந்த, 360 பேரின் பெயர்கள் விடுபட்டிருந்ததால், அவர்களிடம் இரு வாரங்களுக்கு மேலாக விண்ணப்ப படிவம் பெறப்படவில்லை.

இதனால் ஆத்திரமடைந்த மக்கள், நேற்று காலை, 11:00 மணிக்கு, பேளூர் பிரிவு சாலை அருகே, சேலம் - சென்னை தேசிய நெடுஞ்சாலையில் மறியலில் ஈடுபட்டனர். தாசில்தார் ஜெயந்தி, போலீசார், பேச்சு நடத்தினர். அப்போது விண்ணப்ப படிவங்களை உடனடியாக பெற, தாசில்தார் உத்தரவிட்டார். தொடர்ந்து பட்டியலில் பெயர் இடம் பெற பரிந்துரை செய்யப்படும் என, தாசில்தார் கூற, மக்கள் கலைந்து சென்றனர். இச்சம்பவத்தால், ஒரு மணி நேரம் போக்குவரத்து பாதிக்கப்பட்டது.