திருப்புத்துார் தொகுதியில் 335 ஓட்டுச்சாவடிகள் உள்ளன. அதில் திருப்புத்துார் தாலுகாவில் 207 ஓட்டுச்சாவடிகளில் 40 ஓட்டுச்சாவடிகளின் பி.எல்.ஓ.க்களாக பணியாற்றிய அங்கன்வாடி பணியாளர்கள், சத்துணவு பணியாளர்கள், தன்னார்வலர்கள் ஆகியோர் 100 சதவீதம் கணக்கீட்டு படிவங்களை வாக்காளர்களிடம் வழங்கியுள்ளனர்.

அவர்களுக்கு திருப்புத்துாரில் நடந்த பாராட்டு விழாவில் கலெக்டர் பொற்கொடி கேடயங்கள் வழங்கி பேசுகையில், உங்கள் பணி மாவட்டத்தை மேல்நோக்கி அழைத்துச் சென்றுள்ளது. களத்தில் இறங்கி ஆர்வமாக காலம்,நேரத்தை பார்க்காமல் பணியாற்றியுள்ளீர்கள்.

நீங்கள் உங்கள் வீட்டு வேலைகளை பார்த்தீர்களா என்பது தெரியவில்லை. உங்கள் குடும்பத்தை பார்க்காமல் எஸ்.ஐ.ஆர்.படிவத்தை மட்டுமே எண்ணத்தில் கொண்டு வேலை செய்துள்ளீர்கள். மாநிலத்தில் எஸ்.ஐ.ஆர்.பணியில் சிவகங்கை 35 வது இடத்தில். அதை உயர்த்துவது எங்கள் கனவு என்றால், நீங்கள் முழுமையாக சாதித்துள்ளீர்கள். தரவரிசையில் கீழே இருந்த மாவட்டத்தை முன்னோக்கி கொண்டு சென்றதற்கு நன்றி. இவ்வாறு பேசினார்.

திருப்புத்துார் தொகுதி தேர்தல் நடத்தும் அலுவலர் சிவபாலன், தாசில்தார் மாணிக்கவாசகம், துணைத்தாசில்தார்கள் பாலசுப்பிரமணியன்,சந்திரபோஸ், சரவணகுமார் டி.எஸ்.ஓ. உமாமகேஸ்வரி உள்ளிட்ட பலர் பங்கேற்றனர்.