மதுரையில் இருந்து பரமக்குடி வரை நான்கு வழிச்சாலையும் அதன் பின் ராமநாதபுரம் கிழக்கு கடற்கரை சாலை வரை இருவழிச்சாலையும் அமைக்கப்பட்டு வாகனப் போக்குவரத்து நடந்து வருகிறது.

நான்கு வழிச்சாலையில் வாகனங்களில் பழுது ஏற்பட்டாலும், விபத்துகளில் வாகனங்கள் சிக்கி கொண்டாலும் திருப்பாச்சேத்தி சுங்கச்சாவடியில் இருந்து மீட்பு வாகனம், ஆம்புலன்ஸ் உள்ளிட்டவை சென்று மீட்பு பணியில் ஈடுபடும். இவற்றை பராமரித்து வந்த ஒப்பந்தகாரர்களின் ஒப்பந்தம் நவம்பர் 11ம் தேதியுடன் நிறைவடைந்ததால் மீட்பு பணிக்கு வருவதில்லை. மணலுார் பாலம் முடிவடையும் இடத்தில் நேற்று முன்தினம் இரவு சரக்கு வாகனம் டயர் வெடித்து பழுதாகி நடுரோட்டில் நின்று விட்டது.

மீட்பு பணிக்கு வாகனம் வராததாலும், எச்சரிக்கை பலகைகள் வைக்கப்படாததாலும் சரக்கு வாகன டிரைவர் எச்சரிக்கை சிக்னல் காட்டியும் பாலம் முடிவடையும் இடம் என்பதால் அடுத்தடுத்து வந்த வாகனங்களும் விபத்தில் சிக்கின.

தேசிய நெடுஞ்சாலை ஆணைய அதிகாரிகள் தரப்பில் கூறுகையில் : நான்கு வழிச்சாலை பராமரிப்பு நவம்பர் முதல் அடுத்தாண்டு நவம்பர் வரையும், சுங்கச்சாவடி கட்டண வசூல் மே மாதம் முதல் அடுத்தாண்டு மே மாதம் வரையிலும் ஒப்பந்தம் விடப்படும், ஒப்பந்தகாரர் பொறுப்பேற்க தாமதம் ஆவதால் இந்த பிரச்னை ஏற்படுகிறது, என்றனர்.

திருப்பாச்சேத்தி சுங்கச்சாவடியில் கட்டண வசூல் செய்யும் ஒப்பந்தம் முடிந்த அடுத்த நிமிடமே புதிய ஒப்பந்தகாரர் பொறுப்பேற்கும் நிலையில் பராமரிக்க மட்டும் ஒவ்வொரு வருடமும் இரண்டு மாதங்கள் வரை காலதாமதம் ஆவதால் டிரைவர்கள் பரிதவிக்கின்றனர். நவம்பர், டிசம்பர் மாதங்களில் சபரி மலை, பழநி மலைக்கு வரும் பக்தர்கள் ஏராளமான வாகனங்களில் வருகை தருவது உண்டு. தினசரி ஆறாயிரம் வாகனங்கள் சென்று வரும் பாதையில் நவம்பர், டிசம்பரில் இது சற்று கணிசமாக உயரும் எனவே சாலை பராமரிப்பு பணிக்கு உடனடியாக ஒப்பந்தகாரரை நியமிக்க வேண்டும்.