சிவகங்கை மாவட்டத்தில் சிவகங்கை, மானாமதுரை, தேவகோட்டை, காரைக்குடி, திருப்புத்துார் சப் டிவிஷன் கீழ் 48 போலீஸ் ஸ்டேஷன்கள் செயல்படுகின்றன. போலீசார் இரவு, பகல் பாராமல் சட்டம் ஒழுங்கை பாதுகாக்கவும், திருட்டு, வழிப்பறியை தடுக்க போராடினாலும், அவர்களையும் மீறி மாவட்ட அளவில் கொலை, கஞ்சா விற்பனை, சிறுமிகள் மீதான பாலியல் குற்றங்கள், திருட்டு, ஆயுதங்களை காண்பித்து வழிப்பறி, ஆன்லைன் மோசடி போன்ற சம்பவங்கள் அரங்கேறி வருகிறது. சிவகங்கை மாவட்டத்தில் இந்த ஆண்டில் நவ., வரை மட்டுமே 35 கொலைகள் வரை நடந்துள்ளது.

குற்றத்தை தடுக்க 'குண்டாஸ்' தொடர் கொலை, வழிப்பறி, திருட்டு சம்பவங்களில் ஈடுபடுவோரை கட்டுப்படுத்தி, குற்றச்சம்பவம் இல்லாத மாவட்டமாக உருவாக்க போலீசார் போராடி வருகின்றனர். தொடர் குற்றங்களில் ஈடுபடுவோர் ஒரு ஆண்டிற்கு வெளியே வராமல் சிறையில் இருந்தால், குற்றச்சம்பவங்களை குறைக்கலாம் என்ற நோக்கில், 'குண்டர் தடுப்பு காவல்' சட்டத்தின் கீழ் கொலை, வழிப்பறி, ஆயுதங்களை காட்டி மிரட்டுவோர்களை கைது செய்து வருகின்றனர். இம்மாவட்டத்தில் கடந்த ஆண்டு 56 பேர் மீது மட்டுமே 'குண்டாஸ்' சட்டம் பாய்ந்தது. இந்த ஆண்டு இரு மடங்கு அதிகரித்து, 2025 நவ., 27ம் தேதி வரை 109 பேர் 'குண்டாசில்' சிறையில் அடைக்க எஸ்.பி., சிவபிரசாத் பரிந்துரையின் பேரில், கலெக்டர் பொற்கொடி உத்தரவிட்டுள்ளார்.