சிங்கம்புணரி பேரூராட்சி, ஒன்றியம், எஸ்.புதுார் ஒன்றியங்களில் அரசு தொடக்க, நடுநிலை, மேல்நிலைப் பள்ளிகளில் பல்வேறு திட்டங்களில் வகுப்பறை கட்டடங்கள், கழிப்பறைகள், காம்பவுண்ட் சுவர் கட்டப்படுகிறது. ஒரு சில கட்டுமானங்கள் தவிர பல இடங்களில் தரம் குறைவாகவே கட்டப்படுவதாக பெற்றோர் புகார் தெரிவிக்கின்றனர். ஏற்கனவே இப்பகுதியில் பல்வேறு பள்ளிகளில் கட்டப்பட்ட கட்டடங்கள் அவற்றின் ஆயுட்காலம் முடிவதற்கு முன்பாகவே பழுதாகி இடிந்து விழுந்து இடிக்கப்பட்டுள்ளன.

கூரை பெயர்ந்து மழை நீர் ஒழுகும் நிலை பல பள்ளிகளில் உள்ளது. மேல்தளம் முறையாக அமைக்கப்படாததால் தண்ணீர் தேங்கி கட்டடத்தின் உறுதி தன்மையை இழந்து விடுகிறது. கழிப்பறைகள் ஓரிரு வருடங்களை கூட தாக்கு பிடிப்பதில்லை, விரைவில் உடைந்து இருந்த இடம் தெரியாமல் மறைந்து விடுகிறது. காம்பவுண்ட் சுவர்களும் சில பள்ளிகள் தவிர பல இடங்களில் மெல்லிய பூச்சுடன் உறுதி இல்லாமல் கட்டப்பட்டு வெடிப்பு ஏற்படுகிறது. இதனால் மாணவர்களின் பாதுகாப்புக்கு அச்சுறுத்தல் ஏற்படுவதாக பெற்றோர்கள் தெரிவிக்கின்றனர்.

மாணவர்கள் தங்கிப் படிக்கும் பள்ளி கட்டடங்கள் பாதுகாப்பாக இருத்தல் மிகவும் முக்கியம் என்பதால் இத்தாலுகாவில் தற்போது நடைபெற்று வரும் அனைத்து பள்ளி கட்டடங்களையும் முறையாக ஆய்வு செய்து, அந்தந்த பள்ளிகளின் மேலாண்மைக் குழு, பெற்றோர் ஆசிரியர் கழகம், முன்னாள் மாணவர் அமைப்புகளுடன் ஒருங்கிணைந்த மேற்பார்வையுடன் தரமாக கட்டப்படுவதை மாவட்ட நிர்வாகம் உறுதி செய்ய வேண்டும்.