கீழடியில் மத்திய, மாநில தொல்லியல் துறை சார்பில் 2015 முதல் அகழாய்வு பணி நடந்து வருகின்றன. இதுவரை பத்து கட்ட அகழாய்வு நடந்த நிலையில் கீழடியில் கண்டறியப்பட்ட பொருட்களை பொதுமக்கள் காணும் வகையில் அருங்காட்சியகம் கட்டப்பட்டு பார்வையாளர்கள் ரசித்து வருகின்றனர்.

கீழடி அருங்காட்சியகத்திற்கு தினசரி இரண்டாயிரத்திற்கும் மேற்பட்ட சுற்றுலா பயணிகள் வந்து செல்கின்றனர்.

கீழடி அகழாய்வு குறித்து சுற்றுலா பயணிகள் அறிந்து கொள்ளும் வண்ணம் கீழடி குறித்த புத்தகம் தொல்லியல் துறை சார்பில் தமிழில் வெளியிடப்பட்டது. கீழடி அருங்காட்சியகத்தில் புத்தக விற்பனை நிலையம் திறக்கப்பட்டு கீழடி அகழாய்வு குறித்து வெளியிடப்பட்ட புத்தகங்கள் தமிழ், ஆங்கிலம், ஹிந்தி, மலையாளம் உள்ளிட்ட பல மொழிகளில் விற்பனைக்கு வைக்கப்பட்டுள்ளன.

கீழடி அருங்காட்சியகம் வந்த சுற்றுலா பயணிகள் அதிகமாக தமிழ், ஆங்கில பதிப்புகளையே விரும்பி வாங்கினர்.

நவம்பர் முதல் தமிழ் புத்தகங்கள் விற்பனை செய்யப்படவே இல்லை. இது குறித்து தினமலர் நாளிதழில் படத்துடன் செய்தி வெளியானதை தொடர்ந்து மீண்டும் தமிழ் புத்தகங்கள் விற்பனைக்கு வைக்கப்பட்டன.