ஸ்ரீரங்காபுரம் மேற்கு பகுதியில் தாடிச்சேரி கண்மாய் அமைந்துள்ளது. இக்கண்மாய் 100 ஏக்கர் பரப்பில் அமைந்துள்ளது. கண்மாய்க்கு பெரியாறு கால்வாய் மூலம் தண்ணீர் வருகிறது. இக் கண்மாய் நீரினால் தாடிச்சேரி, ஸ்ரீரங்காபுரம், நாகலாபுரம் பகுதியில் உள்ள 350 ஏக்கர் பாசன வசதி பெறுகின்றன. ஆனால் கண்மாயில் நீர் நிரம்பி 4 ஆண்டுகளுக்கு மேல் ஆகிறது. முல்லைப்பெரியாறு அணையில் போதிய அளவில் நீர் இருந்தும் இந்த கண்மாய்க்கு நீர் திறப்பதில் அதிகாரிகள் அலட்சியம் செய்வதாக விவசாயிகள் புகார் கூறுகின்றனர். மேலும் ஆண்டு தோறும் நீர்வளத்துறை, ஊராட்சி சார்பில் கரைகளில் மட்டும் ஆங்காங்கே புற்கள், செடிகள் வெட்டப்படுகின்றன. கண்மாய் முழுவதும் வளர்ந்துள்ள கருவேல மரங்களை அகற்ற அதிகாரிகள் முன்வரவில்லை. கண்மாயின் இரு மதகுகள் வழியாக தண்ணீர் திறக்கப்படும். ஆனால், மதகு பகுதிகளில் முட்புதர் மண்டியுள்ளது. தற்போது குறைந்த அளவு நீர் உள்ளதால் சுத்தம் செய்ய இயலவில்லை.

பல ஆண்டுகளாக நீர் திறக்கப்படாததால் மதகில் இருந்து நீர் செல்லும் வாய்க்கால்கள் பல இடங்களில் துார்ந்துள்ளன. விவசாயிகள் கூறியதாவது

நீர் திறக்க மறுக்கும் அதிகாரிகள் ஜெயராஜ், விவசாயி, ஸ்ரீரங்காபுரம் : ஆண்டுதோறும் முல்லைப்பெரியாறு அணையில் நீர் இருப்பை பொருத்து பெரியாறு வாய்க்காலில் 25 நாட்கள் வரை தண்ணீர் வழங்க வேண்டும். கடந்த சில ஆண்டுகளாக அணையில் போதிய அளவில் நீர் இருந்தாலும் முழுமையாக ஏழு நாட்களுக்கு கூட தண்ணீர் வழங்க வில்லை.

நீர் வழங்கும் நாட்களிலும் 50 கன அடி வழங்க வேண்டும், ஆனால், 30 கன அடிக்கு குறைவாகவே வழங்குகின்றனர். இதனால் கண்மாய் நிரம்புவதில்லை. ஆண்டுதோறும் கண்மாய்க்கு நீர் வழங்க வேண்டும்.

முன்பு ஆண்டு தோறும் கலெக்டர்கள் இக் கண்மாயை பார்வையிடுவார்கள். அதனால் அதிகாரிகள் உரிய நாட்களில் தண்ணீர் திறப்பார்கள். கலெக்டர், உயர் அதிகாரிகள் வராததால் சரிவர தண்ணீர் திறப்பதில்லை.

நிலத்தடி நீர் சரிவு வேல்முருகன், விவசாயி, ஸ்ரீரங்காபுரம் : நான்கு ஆண்டுகளாக கண்மாய் நிரம்பவில்லை. இதனால் நிலத்தடி நீர் குறைந்து வருகிறது. இதனால் ஸ்ரீரங்காபுரம் பகுதியில் மக்காச்சோளம் சாகுபடி பாதிக்கப்பட்டுள்ளது. கண்மாயை ஆக்கிரமித்து வளர்ந்துள்ள மரங்களை அகற்ற நடவடிக்கை எடுக்க வேண்டும். குறிப்பிட்ட பகுதியில் சிலர் குப்பையை கொட்டுவதால் நீர் மாசு ஏற்படுகிறது. மதகு, மதகில் இருந்து நீர்செல்லும் வாய்க்கால் உள்ளிட்டவற்றை சீரமைக்க வேண்டும்.