இடுக்கி மாவட்டத்தில் 2 லட்சம் ஏக்கரில் ஏலக்காய் சாகுபடி நடைபெறுகிறது. தமிழகம் மற்றும் கேரளாவை சேர்ந்த விவசாயிகள் தலா 50 சதவீதம் பரப்பில் விவசாயம் செய்து வருகின்றனர். ஏலக்காய் உற்பத்தி செலவு அதிகமாக இருக்கும்.

தொழிலாளர் கூலி, உரம் பூச்சி மருந்துகள் விலை விவசாயிகளை பாதிக்கும் வகையில் 15 ஆண்டுகளாக இருந்து வருகிறது.

மேலும் அதிக மழை அல்லது வறட்சி என்ற சீதோஷ்ண நிலை மாற்றங்களும் விவசாயிகளை அவதிப்படுத்தி வருகிறது.

இந்நிலையில் இந்த சீசனில் மகசூல் கடுமையாக பாதிக்கும் என மதிப்பிடப்பட்டது. ஆனால் தற்போது நிலைமை மாறியுள்ளது. சமீபத்தில் பெய்த மழை காரணமாக மகசூல் கிடைக்கும் என்ற நிலை உள்ளது.

எதிர்பாராத வறட்சி காரணமாக இந்திய ஏலக்காய்க்கு போட்டியாக உள்ள குவாதிமாலா நாட்டில் ஏலக்காய் உற்பத்தி கடுமையான சரிவை சந்தித்ததால், இந்தியா உலக அளவில் உற்பத்தியில் முதல் இடத்தை பிடித்துள்ளது. இதற்கிடையே விலையை பொறுத்த வரை கடந்த சில மாதங்களாகவே சராசரி விலை கிலோ ரூ.2400 முதல் ரூ.2600 க்குள் கிடைத்து வருகிறது. இது விவசாயிகளை பாதிக்காத கட்டு படியாகும் விலையாகும்.

பாதிக்கும் என்று மதிப்பிடப்பட்ட மகசூலும் விவசாயிகளின் கையை கடிக்காத நிலையில் இருக்கும் என்பதால் இந்த சீசனில் ஏலக்காய் விவசாயிகள் திருப்தியாக உள்ளனர். தற்போதுள்ள விலை அதிகரிக்க வாய்ப்பிருப்பதாகவும் மார்க்கெட்டிங் ஆய்வாளர்கள் கூறுகின்றனர்.