தேனி மாவட்டத்தில் சுற்றுலா தலமாக மேகமலை பகுதிகளை அறிவித்துள்ளது. இயற்கை எழில் கொஞ்சும் பகுதிகளாகும். அடர்ந்த வனத்தின் மத்தியில் தேயிலை தோட்டங்களும், நீண்டு வளைந்து வளைந்து செல்லும் நீர்த்தேக்கங்களும் சுற்றுலா பயணிகளை கவரும் அம்சங்களாகும்.

குறிப்பாக எப்போதும் ஜில் என்ற சீதோஷ்ண நிலை இருக்கும். ஆனால் மழை மற்றும் பனி காலங்களில் இங்கு இருக்க முடியாது.

ஆனால் இந்த சீசனில் ஒரு வித்தியாசமான சீதோஷ்ண நிலை நிலவுகிறது. எந்த எந்தாண்டும் இல்லாத வகையில் உச்சபட்ச குளிரும், அதே அளவிற்கு பனியும், பனி மூட்டமும், சாரல் மழையும் பெய்து வருகிறது. இதனால் இங்குள்ள தோட்ட தொழிலாளர்கள் கடுமையாக பாதிக்கப்பட்டுள்ளனர். காய்ச்சல், சளி, ஜலதோஷம் என மழைக்கால சீசன் நோய்கள் தாக்கி வருகிறது.

ரோட்டில் செல்லும் வாகனங்களை பார்க்க முடியாத அளவிற்கு பனி மூட்டமும், ரோட்டில் இறங்கி இயற்கை அழகை ரசிக்க முடியாத நிலையும் இருப்பதால், சுற்றுலா பயணிகளின் வருகை முற்றிலும் குறைந்து விட்டது.

எப்போதும் கூட்டம் இருக்கும் மணலாறு, ஹைவேவிஸ், இரவங்கலாறு, தூவானம் பகுதிகள் வெறிச்சோடி கிடக்கின்றது. வனத்துறையினர் ரோந்து சுற்றி வருகின்றனர்.