தேனி நாடார் சரஸ்வதி கலை அறிவியல் கல்லுாரியில் மதுரை இலக்கிய மன்றம், ஸ்ரீ அருணாச்சலா கல்வி அறக்கட்ளை சார்பில் ஆசிரியர்கள், என்.சி.சி., பயிற்றுநர் களுக்கு விருது வழங்கும் விழா நடந்தது.

இதில் வருமான வரித்துறை முதன்மை கமிஷனர் வசந்தன் பேசியதாவது: ஆசிரியர் பணி புனிதமானது. அவர்கள் ஏணிப்படிகளாக இருந்து பல அறிஞர்களை உருவாக்குகிறார்கள். இந்தியாவில் 20 ஆயிரம் மாணவர்களுடன் துவங்கப்பட்ட என்.சி.சி.,யில் தற்போது 20 லட்சத்திற்கும் அதிகமான மாணவர்கள் உள்ளனர்.

அதில் 40 சதவீதம் மாணவிகள் உள்ளனர் என்பது தேசத்திற்கு பெருமை. என்.சி.சி.,ல் சேர வாய்பு கிடைத்தால் மாணவர்கள் சேர வேண்டும்.

என்.சி.சி., மாணவர் களுக்கு வேலைவாய்பில் முன்னுரிமை உள்ளது. எந்த சூழலையும் சமாளிக்கும் திறனை ஆசிரியர்கள் மாணவர்களுக்கு கற்பிக்க வேண்டும்.

மாணவர்கள் முன்னேற்றத்திற்கு அதிக புத்தகங்கள் வாசிக்க வேண்டும். நாடு முன்னேற்றம், வளர்ச்சிக்கு வரியை உரிய நேரத்தில் செலுத்த வேண்டும் என்றார்.

நிகழ்வில் தேனி ஏ.டி.எஸ்.பி., கலைக்கதிரவன், சி.இ.ஓ., நாகேந்திரன், தேனி மேலப்பேட்டை இந்து நாடார்கள் உறவின் முறைத்தலைவர் தர்மராஜன், துணைத்தலைவர் ஜீவகன், பொதுச்செயலாளர் ஆனந்தவேல், கல்லுாரி செயலாளர் மாறன் மணி, மதுரை இலக்கிய மன்ற நிறுவனர் அவனிமாடசாமி உள்ளிட்டோர் பங்கேற்றனர்.